LÊL AMED/AMED Pêroyina Dinya de kêm zî bibo vilabîyayişê Vîrûsê Koronayî domyeno, çarçiweya tedbîran zaf hûmarî de rasteyan de pîrozkerdişê rojê muhîm ameyê betalkerdiş, misal pîrozkerdişê Newroze ame betalkerdiş. Roja Kedkar û Karkaran 1ê Gulane nêz bena la rasteyan de pîrozkerdişê 1ê Gulane mumkin nîno dîyîş la roja xo ra karkeran hewna do wayîr bivejê. Muhîmîya 1ê Gulane û rewşa pêroyine ser o verin Hemserekê ESPê Amedî û nika Rayberê HDPê Amedî Ramazan Karakaya qise kerd û va ke emserre Roşanê Kedkar û Karkeranê 1ê Gulane, kedkar û karkeran çi heyfo ke rîyê Vîrûsê Koronayî ser o rasteyan de nêeşkerî do pîroz bikê la dormeraya sosyalîst, çepgir, kedkar û sendîkayê karkerî yê şorişgerî do hewna kûçe û rasteyan de bibî. Dewletan îflas kerdê Karakaya destnîşan kerd ke kedkaran rewşêka cuda de 1ê Gulane pêşwaz kenê, Dinya de kapîtalîzm krîzê bîyayişî cuyeno, girêdayê na rewşe Vîrûsê Koronayî rasteyê îktîsadî, komel, polîtîk, kultir û exlaqî de dewletan da îflaskerdiş. Armancê AKPî patronan zengînkerdiş o Karakaya wina va: “Na konjukturê Dinya, Tirkîya û Kurdistanî de kedkaran ra bêkarî û feqîrî anena. Nika karkerê ke bi zorîya AKPî xebityenê, vera Vîrûsê Koronayî rewşêka bêtedbîrî de xebityenê, çimkî armanc patronan hîna zengînkerdiş o. Îqtîdar yew hetî ra vengê keye de bimanî keno, yew het ra zî kûçeyan girewto binê zaptê xo. Ganî vera nê zilm û zordarîya de roja 1ê Gulane de karker û kedkaran bi şîara azadî û seba cuyaye karê ra fek veradê, roja 1ê Gulane rasteyan de bi çarçiweya mesafeya komelî roja xo pîroz bikê. Hewna roja 1ê Gulane de heme karker û kedkarê balkonanê xo rê çaputo sûr bielîqnê, marşê xo bîyarê ziwan û ceryanê xo bitefînî û biakê.”