Akademîsyene Nurîye Gulmene û Mamosta Semîh Ozakça çarçeweya Qerarnameyê Hukmê Qanûnî (KHK) karê xo ra ameybî îxraçkerdiş. Gulmene û Ozakça seba ke biagêrî karê xo 223 rojî yo ke xover danî û reyna Gulmene û Ozakça 104 rojî yo grevê vêşanî de yî. Rewşa her 2 perwerdekaran zî ver bi xirabîye de şona.Kedkarê komelkî yê Amedî Babete ser o qisey kerdî û seba ke hesasîyet bivirazîyo, veng dayî.Endamê Egîtîm Senî Havva Karahanciye va ‘ganî rayapêroyî û bitaybetî zî rêxistinê sîvîlî reaksîyonêko cîddî nîşan bidî’ û wina dewam kerde: “Ganî vera na keda ke embazanê ma awan kerda de bêveng nêmanî. Eke bêvengî bibo, do netîce de bi hawayo cîddî muhasebeyêko wijdanî reyde rî bi rî bêro mendiş. Eke wina bidomîyo bedelê bêvengîye do hîna giranêr bibo. Çimkî ê babeta ke heqdar î de têkoşîn danî.”
Şikîyayîşo gird
Karahanciye dewamê qiseykerdişê xo de va ‘eke bêvengî wina bidomîya û Nurîye û Semîh bimirî, o wext do komelî de şikîyayîşêko gird bêro cuyayîş’ û qiseykerdişê xo wina domnaye: “Çimkî eke wina bibo, o wext do bedelo ke hetê merdiman ra yeno dayîş, vengî ra şêro û no zî bibo sebeb ke çimê înan de heme çî biqedîyo. O wext do merdiman de fikrê ‘heme çî bin zext û tedayî de yo’ awan bibo. Cok ra ganî ti kes vera xoverdayîş û têkoşînê nê embazan de bêveng nêmano.”
Grev roja 104. de yo
Endama Egîtîm-Senî Mizgîn Yavuze zî va ganî ‘xoverdayîşê 104 rojan cesaret bido her kesî’ û wina dewam kerde: “Vera nê xoverdayîşî de bêvengî û pelçiqîyayîş nîno qebulkerdiş. Na bêvengî sey barêk milê ma ser de ya. Keda ê embazan destê înan ra ameye girewtiş. Çîyo ke lazim o ma bikerî, ganî ma wayîrê keda înan bivejyî. Ganî ma pey xoverdayîşê înan de bivinderî. Hende teda nuqtayêk ra dima beno sebebê teqayîşî. Teqayîş zî seba başîya komelî beno. Heta ke erey nêbîyo, ganî ma nê teqayîşî bidî cuyayîş.”
SAFÎYE ALAGAŞ / ŞÛJIN / AMED