Weşênayîşê vîdeoya veşnayîşî yê leşkerê bi nameyê Sefer Taş (23) û Fetîh Şahînî (26) ke 22ê kanûna 2016 de hetê DAIŞî ra amebî veşnayîş ser o 7 aşmî vîyartî. Îdîayê veşnayîşê leşkeran ra hende wext vîyart, labelê hema zî ti îzehetêk nêdîyayo keyeyê leşkeran. Sefer Taş 1ê êlûle 2015 de amebî remnayîş. Babete ser o pîyê Sefer Taşî Aydin Taşo ke qezaya Aralikî yê Îdirî de cuyeno, qisey kerd.
Taşî vist vîrî ke ‘22 aşmî ra zêde yo ke îzehetêk çin o’ û wina dewam kerd: “Ez hende cayan gêrena, la kesê ke xeber bidî çin î. Cayo ke ma muracaat nêkerd, nêmend. Ez nêzana ke lajê mi esto yan zî çin o. Eke îdarekarê îzehetêk nêdî mi, ez do muracatê Mehkemeya Heqê Merdiman ya Ewropa (AÎHM) bikera. Seba qerarê gaîbî, mi doze akerd. Doze 1ê tebaxe de ya.”
Îlanê rojname çin o
Taşî dewamê qiseykerdişê xo de çapemenî ra piştî waşt û wina qedêna: “Seba aqubetê lajê xo, mi 3 gulane de muracat kerd. Hakim mi ra va ‘heta ke ez îlanê rojnameyî nêvîna, ez nêeşkena qerar bida. Ez do cigêrayîşan bikera, belkî lajê to cuyeno. Eke çîyêk nêvejîyo ma do îlanê şehîdbîyayîşî bidî’. Wa çapemenî piştî bido keyeyanê sey ma. 2 serrî yo ke mi ti piştîdayîşê dewlete nêgirewto. Dewlete pere da, la mi qebul nêkerd.
DÎHABER/ÎDIR