Endama Platformê Cinîyê ke Bizorî Ameyî Hepiskerdiş Ayşe Gokkane derheqê êzidîyê ke bi zorî erşawîyayî kampanê AFADî de qisey kerde û wina va: “Ganî êzidîyî kamp rê nê, bierşawiyî Şengal”
Êzidîyê ke 2014 de hêrişê çeteyanê DAIŞî ver, bi hawayo mecbûrî Şengal ra koç kerdbî û ameybî Amed de Kampê Fîdanlikî de bica bîbî, bado ke qayûm tayînê Şaredarîya Yenîşehîrî bî, erşawîyayî Kampê AFADî. Kampê AFADî de erebî manenî û êzidîyî vanî ke mîyanê nê ereban de çeteyê DAIŞî estî.
Babete ser o Endama Platformê Cinîyê ke Bizorî Ameyî Hepiskerdiş Ayşe Gokkane qisey kerde.
Gokkane va ‘cinîyî şengalijî bîbî şahidê tecawizbîyayîş û qirbîyayîşê waye, kêna û dayîkanê xo’ û qiseykerdişê xo wina domnaye: “Her çiqas ke cinîyê ke hetê çeteyan ra ameybî remnayîş, tayê înan ameyî rizgarkerdiş, hema zî destê çeteyan de cinîyî estî. Nê hêriş û qirkerdişî seba şarê êzidî reya sifteyîne nînî kerdiş. Cinîyê şengalijî çeteyan ra remayî, ameyî tîya de kampo ke hetê şaredarîyê DBPyî ra amebî viraştiş de bica bîbî. Şaredarîye heme tewir lazimîyê înan dîyêne. Ma bi xo embazanê xo ewja de wezîfedar kerdbî.”
Ganî waştişê înan bivînî
Gokkane dewamê qiseykerdişê xo de va ‘hewl danî ke bi astengî û mehrumkerdişan şarê êzidî terbîye bikerî’ û wina dewam kerde: “Heme kesê ke hetkarîye dayênê, kampî ra ameyî vetiş. Nizdîbîyayîşê dewlete yê êzidîyan polîtîk o û bi hawayo aşkere orte de yo. Hêzê ke Şengal de serkewtî, veng dayî ke wa êzidîyî biagêrî ca û warê xo. La tam no wext de qayûmî kampê înan vila kerd. No nîno qebulkerdiş û do têkoşînê ma bidomîyo.”
Seba dîktatoran estî
Gokkane peynîya qiseykerdişê xo de wina va: “Şengal nika bajarêko xoser û azad o. Seba şengalijan cayêko tewr biewle û Şengal û erde Kurdistanî yo. Kampê AFADî de çeteyê DAIŞî estî. Kamp de êzidîyî raştê vatişanê nefretî yenî. Ganî rêxistinê mîyanneteweyî bi hawayo lez kom bibî û Şengalî sey cayêko xoser îlan bikerî. Heta ke vera şarî de hêrişî cîdî nêbîyî, ganî şarê Şengalî bierşawîyo erdanê xo. Ganî waştişê hêzê ewleyî yê ke ewleyîya Şengalî kenî, goşdarî bikerî. Ma veng danî rayapêroyî û rêxistinanê cinîyan ke wa na babete de hesas têbigêrî. Cayo ke Tirkîya vana ‘sînorê min î’ nê cayê aydê şarî yî.”
ŞÛJIN / AMED