Teşebusê derbe ke 15ê Temuze de ame kerdiş ra dima hepisxa neyan de îşkence, zext û neheqîyî zêde bîyî û her ke şono rewşa hepsîyan hîna xirabin beno. Roje çin o ke hepisxaneyan ra xebera neheqî, zext, îşkence û sewbîna nêro. Nuştox Adîl Okayî babete ser o qisey kerd.
Okayî va ‘OHAL ra dima hepisxaneyo ke tede zext, îşkence û neheqî nîno kerdiş, nêmendo’ û qiseykerdişê xo wina domna: “Bitaybetî hepisxaneyanê Tarsûs, Sîncan, Şakran û Sîlîvrî de rewşe zaf giran bîya û neheqîyî vejîyayî duştê tewr berz. Heta nika hepisxaneyan de keso ke rastê îşkence û neheqî nêameyo, nêmendo. Ma bi çend embazan seba ke problemê hepisxaneyan bidî eşnawitiş keyepelêk bi nameyê www.gorulmustur.org akerdo û mektûbê ke yenî ma no keyepel ser o weşênenî.”
Zebanî bihêz bîyî
Okayî bale ant ser zêdebîyayîşê astengîyê mektube û faksan û wina va: “Êdî mektûbî bi hawayo erey dîyenî hepsîyan. Cezayê komunîkasyonî zêde bîyî. OHAL ra dima heqê merdiman duştêko tewr berz de yenî pelçiqnayîş. Reyna surgunî zêde bîyî, nê semedî ra ma adresan newe kenî. Nika tecrîd mîyanê tecrîdî de, qedexeyê bikêfî, tedawînêkerdişê hepsîyanê nêweşan û sewbîna benî. Rewşa OHALî destê zebanîyan xurt kerdo. Wexto ke dewlete vaja bide piro, ê kişenî.”
Cayê nêweşîyan o
Okayî va ‘yê raşt o yo ke ganî merdim seba hepisxaneyan bivajo cayê dîzaynkerdişê bizorî û nêweşkerdişê hepsîyan o’ û qiseykerdişê xo rê wina dewam kerd: “Teber de zî çuweya dewlete ma ser de esta, nê semedî ra ma teber de zî azade nîyî. Labelê hepisxaneyan de rewşe zaf cîya ya. Tarîxê komare ra nata hepisxaneyî qet nêbîyî cayê islahkerdişê hepsîyan, her tim bîyî laboratûvarê ke şexsan bêrûmet keno û çin keno. Tirkîya de pêro pîya 360 hepisxaneyî estî û hemînan de zî surgun, zext, neheqî û îşkenceyo psîkolojîk duştê tewr bitehluke de yo. Badê hepisxaneyan de hûmare 210 hezarî vîyarna, problemê cayî vejîya. Îdareyê hepisxaneyan nê problemî bi eştişê kurd, sosyalîst, çepgir û welatperweran yê hucreyan waşt çareser bikerî. Dima ra qanûn vetî û bi hezaran hepsîyan vetî teber. Nika pêro pîya 197 hezar hepsîyî estî û Wezîrê edaletî aşkere kerd ke do 17 hepisxaneyê neweyî do bêrî viraştiş.” 900
Okayî peynîya qiseykerdişê xo de wina va: “Nika Tirkîya de 900 hepsîyê nêweşî estî. Nîmeyê nê hepsîyan rewşa înan giran a û ganî serbest bêrî veradayîş. Ma hewl danî vengê hepsîyan bidî eşnawitiş. Her keso ke xo ra vano ez çepgir û welatperwer a, ganî xo rê yew embazê mektûbe biveyno. Çimkî yê ke hepsîyan lingan ser de gêno, înan ra ya muhîm mektûbe ya.”
OZGUR AYDIN / ANF / ÊLIH