Partîya Demokratîke ya Şaran (HDP) bi siloganê ‘Ma nêvinderî, Vajî Bivindere, Faşîzmî Bivindarnî’ Nobeta Edalet û Wijdanî Amed de daye destpêkerdiş û çalakîya nobete Amed ra dima Stenbol, Wan û Îzmîr de zî qasê hewteyêk do dewam bikera. Babete ser o Hemverfekê Kongreya Demokratîke ya Şaran (HDK) Prof. Dr. Onur Hamzaogluyî qisey kerd.
Hamzaogluyî bale ant nobeta sifteyîne ya ke Amed de Parka Ekîn Cerene de ameye viraştiş ser û wina va: “Bifikirîyênê; şima Meclîs de kombîyayîşêk virazenî şar şêno beşdar bibo, labelê Parlamenterê HDPyî Amed de cayêko aydê rayapêroyî de kombîyayîşêk virazenî, beşdarbîyayîşê şarî yeno astengkerdiş. Seba ke tena parlamenterî nobete bitepişî, îqtîdar zext keno. Nika muxalefet her ke şono hîna zaf hîra beno. Ganî ma bi muxalefet tepîya game nêdî eştiş.”
Ganî wayîr bivejyî
Hamzaogluyî dewamê qiseykerdişê xo de va ‘êdî çîyêko şar îqtîdar ra biwazo nêmendo’ û wina dewam kerd: “Êdî ma se bikerî, ganî ma bi xo bikerî. Nobete zî nînan ra yew a. Kesê ke sey AKPyî nêfikirîyenî û ci ra cîya yî, bêhuzir î. Ganî ma wayîrê ziqaqan bivejyî. Komel her ke şono feqîr beno û heme hetan de zext û şîddet vîneno. Ganî ma bişînbî problemanê şarî rê çareserîyan bivînî. Nobeta Edalet û Wijdanî seba çareserîya probleman muhîm a. Ganî ma ziqaqan veng nêkerî. Reyna ganî muxalefetê Tirkîya xo bi waştişê edaletî sînordar nêkero û wijdanî zî esas bigîro. Lazim o ma heme hetan beşdarê nê prosesê têkoşînî bikerî.”
Ma pîya bikerî
Hamzaogluyî peynîya qiseykerdişê xo de va ‘blokê îqtîdarî rijîyayo’ û wina qedêna: “Seba ke ma bişînbî astengîyê nobeta bajarê Amedî de vejîyayî derbaz bikerî, lazimîya ma bi rêxistinîya şarî esta. Ma do heme pîya nêyî bikerî. Ganî ma vera xo bidî şarî û şar rêxistine bikerî. Seba ke ma bişînbî şaranê Tirkîya ra karker, wendekar, ciwan, cinî û heme hetanê bînan bi çalakîya nobete bîyarî têhet û çalakîyanê winasîyan zêde bikerî.
DÎHABER/ÎZMÎR