Endama Komîteya Merkezî ya PKKyî Hemrîn Dêrsime bale ante hêrişanê dewleta Tirkî yê vera Rojawan û Başûrê Kurdîstanî ser û wina va: “Şarê Rojawanî vera dewleta Tirkî ya ke paştgêra tewr girde ya DAÎŞî ya ke hêrişê heme çîyanê Kurdan kena de do qezencanê xo bipawo. Ganî ma mezg, zerrî û ruhê xo bikerê yew.”

TOPRAK EREN / ANF/BEHDÎNAN 

Dewleta Tirkî û çeteyê ci hewl danî bi hêrişkerdişê Rojawan û Başûrê Kurdîstanî qezencanê Kurdan bikerî hedef. Çimkî heta nika xeylê reyan ameyo dîyayene ke dewleta Tirkî kura de Kurdan çîyêk qezenç kerdo, hêrişê qezencanê Kurdan kerdo. Na çarçewa de operasyonê vera Xakurkê û munaqeşeyê mudaxaleyê Rojawanê Kurdîstanî, rojeva Tirkîya ra nêkewena.

Babete ser o Endama Komîteya Merkezî ya PKKyî Hemrîn Dêrsime qisey kerde û Dêrsime dîyar kerde ke amancê dewleta Tirkî tena dagîrkerdişê Rojawanî nîyo, amancê aye dagîrkerdişê heme Kurdîstanî yo. Dêrsime vera hêrişan de da zanayene ke labelê yewîya şaranê Rojawan û Vakurê Sûrîye do plananê îşxalî yê dewleta Tirkî pûç vejo.

Dêrsîme Roşanê Ganîbîyayîşî yê 15ê Tebaxe zî pîroz kerd û şehîdê 15ê Tebaxe yad kerdî. Dêrsime dewamê qiseykerdişê xo de wina va: “Ma timûtim vanê şerê dinya yê 3. de Kurdî û hêzê Kurdan rolo gird kay kenê û eşkenê rolêkê stratejîk bigêrê xo ser. Coka ewro Rojawan xover dano. Dewleta Tirkî ya paştgêrê DAÎŞî ewro vera Rojawanî de hêrişê dagîrkerîye rayra bena.”

Ganî qezencî bêrê pawitene

Dêrsime qiseykerdişê xo de qala dagîrkerîye kerde û wina va: “Dewleta Tirkî heme leteyanê Kurdîstanî de bi mehneyê PKKyî hêriş kena. Waştişê înan dagîrkerdişê Kurdîstanî yo. Vera naye de şarê Rojawanî do qezencanê Rojawanî bipawo. Dewleta Tirkî çend hêriş kena wa bikero do çîyêk dest mefînê. Na babete de paştîya ma şarê ma ra pêt a. Eke şarê ma yew bo û pîya tê bigêro nê polîtîkayê dagîrkerîye do pûç bêrê vetene. Ma ganî destûr medo ke rewşa Efrînî reyna bibo. Rayber Apo zî tim îfade keno ke hêzo tewr gird hêzê şarî yo. Eke şarê ma hêzê xo ra bawer bikero, qet kes nêeşkeno vera înan de vindero. No zî bi yewbîyayîş û rêxistinbîyayîşî, xeta Rayber Apoyî de têkoşîn dayîşî beno. Şarê ma bi bedelanê girdan heta ewro ame. Çîyê ke bi gonîya bi hezaran şehîdan ameyî qezençkerdene, ganî bêrê pawitene û şarê ma do naye bikero.”

Şarê Rojawanî do hêrişan pûç vejo

Dêrsime qiseykerdişê xo de bale ante dîyayîşê bedelanê girdan ser û wina dewam kerde: “Roja ewroyêne de herra xo pawitiş û azadîye qezençkerdene rehet nêya. Bi bedelanê girdan benê. Xora ma zî nê bedelan danê. Şarê ma bedelê tewr girdî na babete de dayî. Ma bawer kenê ke xoverdayîşê şaran ê Rojawanî do hêrişê dewleta Tirkî pûç bivejo. Şarê ma çar leteyanê Kurdîstanî de xoverdayîşêko gird dano. Rayber Apo Îmrali de xoverdayîşêko tarîxî dano. Gerîlayê ma vera dagîrkeran de xoverdayîşo destankî rayra benî. Bi nê xoverdayîşî do hêrişê dişmenî bêrê şikitene û dagîrkerî bêro qedênayene.  Rayber Apo vano ke ‘Eke ma mezg, zerrî û ruhê xo bikerê yew, ti hêz nêeşkeno vera ma de ser bikewo’. Coka ganî ma sey şarî çar leteyanê Kurdîstanî de mezg, zerrî û ruhê xo bikerê yew.”

Wext wextê yewîye û xoverdayîşî yo

Dêrsime peynîya qiseykerdişê xo de wina va: “Senî ke vera çeteyan de şarê ma bi yew û Kobanê kerd azad, ganî ewro zî bi eynî metodî eynî netîce bêro girewtene. Wext wextê yewîye û xoverdayîşî yo. Ganî her hetê cuya goreyê naye bêro rêxistinekerdene. Şarê Rojawanî ganî sey şarê Filistînî xover bido û hêrişê dagîrkerîye yê dewleta Tirkî bişikno. Xora hertim mîyanê xoverdayîşî de yê. Nika ganî xoverdayîş bêro xurtkerdene. Wext wextê xoverdayîş û têkoşînî yo, wext wextê ver bi azadîye şîyayîşî yo.”