19ê Tebaxe de şaredarîyê Amed, Wan û Mêrdînî hetê îqtîdarê AKPyî ra ameyî xespkerdene û herinda hemserekanê şaredarîyan de qayûmî ameyî tayînkerdene. Partîya Demokratîke ya Şaran (HDP) roja ke qayûmî tayîn bîyî ra nata vernîya şaredarîyan de çalakîyan virazena.
Çalakîya ke Amed de yena viraştene roja 9. de dewam kena. Xeylê hetan ra sîyasetmedar, hunermend û roşnvîrî zî destek danî çalakîye. Nînan ra yew zî Serekê Pêroyî yê Halkevlerî Nûrî Gunay o. Gunayî vera qayûman de reaksîyon nîşan da û dîyar kerd ke tena kesê HDPyî nê, sewbîna partîyan ra zî kesî ziqaqan de yî.
Gunayî dewamê qiseykerdişê xo de va ‘ma tarîx ra nata bêedaletîya tewr girde reyde têrî yî’ û wina dewam kerd: “Na derbeya sîyasî ya. No problem tena problemê bajarê ke qayûmî ameyî tayînkerde nîyî, problemê Tirkîya yî û heme hetan eleqeder kenî. Çimkî îradeya ke 31ê Adare de vejîyaya werte, ameya xespkerdene.”
Gunayî qiseykerdişê xo de qala bêhuqûqîya ke esta kerde û wina va: “Ma vera bêhuqûqîye de Amed de yî. Sey vizêrî ma do ewro û siba zî raşteyan de bibî. Vera qayûman de reaksîyonê şarî her ke şono zêde beno. Îqtîdar teqez nêşêno nê bêhuqûqî îzeh bikero. Kesê ke no welat de cuyenî û demokrasî wazenî, ganî heme reaksîyon nîşan bidî. Ganî ma na derbe bivindarnî.”
MA / AMED