Nuştoxê kurd Mûsa Anter bi nameyêko bîn Apê Mûsa 25 serrî verê 20ê Êlula 1992î de qezaya Yenîşehîrî ya Amedî de semtê Seyrantepe de hetê JÎTEMî ra amebî qetilkerdiş û ewro Serrgêra 25. ya Qetilbîyayîşê Apê Mûsayî yo. 

Babete ser o lajê Apê Mûsayî Dîcle Anterî qisey kerd û qala têkoşînê huqûqî yê 25 serran kerd. Anterî va ‘na doze doza cînayetê sîyasî ya’ û domna: “Na doze eynî wextî de doza ke sîstemê edaletî yê Tirkîya muhakeme kena ya.”

Anterî dewamê qiseykerdişê xo de va ‘mehkemeyî cînayet roşn nêkenî, eksê ci de hewl danî serê cînayetî padî’ û wina dewam kerd: “Dosyaya Susurlukî de derheqê pîyê mi de tayê çîyî ameyî nuştiş û nê nuşteyî odeyê nimite yê dewlete de estî. Labelê nînî vetiş. Seba ke sucê înan gird o, nêvejenî orte. Yeno famkerdiş ke nê cînayetî goreyê waştişê tayînan yenî kerdiş û nêyî zî hetê tayînan ra yenî pawitiş. Na rewşe awanbîyayîşê Osmanî ra nata wina ya.”


Îxtîmalê remayîşê Yildirimî esto

Seba ke 5 serrê tepişîyayîşê Hamît Yildirimî temam bîyî, Yildirim serbest amebî verdayîş û Anterî vera nêyî de reaksîyon nîşan da û wina va: “No qerar ver ma etirîyenî. Çimkî îxtîmalê remayîşê Yildirimî esto. Cok ra ma mehkeme ra waşt ke wa 2 serrê bînî tepişîyayîşê ci dewam bikero. Çendêkî verê Velî Kuçukî mehkeme de vatbî ‘cînayetî ameyênê kerdiş û cenazeyî erzîyayênê herêma mi, helbuk cînayetî herêma mi de nêbîyênê’. Bifikiryênê, çîyêko îlegal anî keyeyê mi û ez kesê ke nê çîyê îlegalî anî, nas nêkena. Çîyêko winasî mumkin nîyo. Wexto ke yeno perskerdiş, vanî ‘nîno vîra mi’. Labelê nêwazenî vajî.”


Doze sîstemê edaletî muhakeme kena

Anterî dewamê qiseykerdişê xo de va ‘Doza Mûsa Anterî dozêka basîte ya cînayetî nîya’ û wina domna: “Na doza cînayetî ya seserre ya û tîya de sîstemê edaletî yê Tirkîya yeno mehkemekerdiş. Cok ra na doze muhîm a. Eke na doze de raştî bivejîya orte, o wext dozanê bînan de zî raştîyî vejîyenî orte. Zafaneyê ci yenî roşnkerdiş.”


Goreyê mi her di zî zure kenî

Anterî qala şahidîya Parlamenterê AKPyî Orhan Mîroglu û Muhsîn Kizilkayayî zî kerd û wina va: “Êdî ez her dîyan zî goşdarî nêkena. Çimkî qiseykerdişê înan de dîyar beno ke ê se kenî. Ê şahidî nêkenî, dişmenî kenî. Goreyê mi her di zî raşt nêvanî. Do doze 27ê êlule de bêra dîyayîş. Karê ma kesan reyde çin o û ma do çarçewaya huqûqî de edalet bigêrî. Labelê çi heyf ke ma huqûq nêvînenî  û edalet zî çin o. Her ke ma şonî mezelê pîyê xo ser, ma eynî çîyan cuyenî. Deynê ma Apê Mûsayî rê esto. Ganî ma seba ci têkoşîn bidî.” 


 ANF/BRUKSEL