Taxanê Lalebey û Alîpaşa yê qezaya Sûrî ya Amedî de xebatê rijnayîşî dewam kenî. Heto bîn de zî vera nê rijnayîşan de xoverdayîşê şarê her di taxan dewam keno. Bitaybetî cinîyê taxan rayberîya xoverdayîşî kenî.
Babete ser o Hatun Tulaya ke taxa Alîpaşa de cuyena, qisey kerde û reaksîyon nîşan daye. Tulaye va ‘mi temamê emrê xo tîya de derbaz kerd û tîya de zaf vîrardişê mi estîy’ û wina dewam kerde: “Mi bi destê xo keyeyê xo viraşt. Nika wazenî 50 mîlyar pere bidîy ma û keyeyê ma, ma ra bigîrî. Ez pereyê înan nêwazena. Ez wazena erd û keyeyê xo de bicuya.”
Ganî ma wayîrê vîrardişê xoverdayîşî bivejyî
Tulaye dîyar kerde ke polîsan înan ra vatî ‘tîya de do vîllayî bêrî viraştiş û vîllayî zî hetê înan ra ameyî girewtiş’û wina domnaye: “Ma tîya ra vejenî û do herinda ma de vîllayan bivirazî û nê vîllayan pêşkêşê dewlemendan bikerî. Do rojêkî hesabê rijnayîşan bêro perskerdiş. Seba Sûrê tarîxî û vîrardişê hende çîyan ganî şarê Amedî hetê yewbînan de bibo û piştî bido yewbînan. Sûr tena tarîx nîyo, bi vîrardişanê tarîxî pirr o. Seba ke nê tarîxî bi ma bidî vîrîkerdiş, heme çî kenî. Ma do destûr nêdî nêyî. Bêrê ma seba Sûrî pîya xover bidîy.”
AMED