Vera tecrîdo girankerde ke Rayberê Şarê Kurdî Abdullah Ocalanî ser o yeno domnayene de her ke şono reaksîyonî zêde benî. Na çarçewa de xeylê bajaranê Ewropa de çalakîyî yenî viraştene. KCDK-Eye îzehetêko nuştekî daye û wina va: “Azadîya Rayber Apoyî û demokratîkbîyayîşê Rojhelatê Mîyanênî kewtî têmîyan. Wa herkes beşdarê çalakîyan bibo.” Tecrîdo giran kerde ke Rayberê Şarê Kurdî Abdullah Ocalanî ser o yeno domnayene her ke şono hîna zaf yeno giran kerdene. Bitaybetî çend serranê peyênan de no tecrîd resayo dûştêko tewr berz û ti xebere Ocalanî ra nîna girewtene. Heta nika xeylê bajaranê cîya-cîyayan de seba ke bale biancîyo rewşa Ocalanî ser, çalakîyê tewir bi tewirî yenî viraştene û veng dîyeno herkesî ke wa herkes vera tecrîdî de hesas bibo. Bi organîzasyonê Meclîsê Cinîyan yê Roza û Meclîsê Kurdan yê Darmstadtî seba ke bale biancîyo azadîya Ocalanî, bajar de standêk ame akerdene. Çalakîye do heta 11ê Tebaxe dewam bikero. Heto bîn ra Çalakîya Nobete ya Ocalan rê Azadîye ke 2012 ra nata bajarê Strasbourgî de vernîya Konseyê Ewropa de yena viraştene, hewteyo 320. de bêmabên dewam kena. Çalakîye no hewte hetê welatperwerê ke Strasbourgî de cuyenî ra ameye dewr girewtene. Çalakgêrî do heta roja yewşeme çalakîya xo bidomnî. Çalakgêran heta nika xeylê kesê turîstî reyde dîyalog ronayî û derheqê rewşa Ocalanî de melumat dayî xeylê kesan. Mîyanê 320 hewteyan de heta nika nizdîyê 2 hezar kesî beşdarê çalakîya nobete bîyî. KCDK-Eye veng daye herkesî Reyna Kongreya Komelê Demokratîke yê Kurdistanî yê Ewropa (KCDK-E) zî îzehetêko nuştekî daye û seba ke herkes beşdarê çalakîyê ke seba azadîya Rayberê Şarê Kurdî Abdullah Ocalanî yenî viraştene bibî, veng daye. KCDK-Eye dîyar kerdo ke şer û pêrodayîşê ke Kurdistan û Rojhelato Mîyanên de benî, krîzê herême hîna zaf kûr kenî û wina domnayo: “Na rewşa krîz û pêrodayîşin nêçareserîye danî ferz kerdene. Rayber Apoyî seba ke heme nasname û bawerîyî bişênbî pîya bicuyî, paradîgmaya neteweya demokratîke pêşkêş kerdo. Paradîgamaya ke azadîya cinîyan esas gêna, ewro sey çareserî yena qebul kerdene.” Heta 11ê Tebaxe çalakîyî virazîyenî KCDK-Eye îzehetê xo wina qedênayo: “Ewro seba demokratîkbîyayîşê Kurdistan û Rojhelatê Mîyanênî azadîya Rayber Apoyî esas o. Azadîya Rayber Apoyî û demokratîkbîyayîşê Rojhelatê Mîyanênî kewtî têmîyan. Kongreya 3. ya KCDK-E de qerarê viraştişê çalakîyê ke azadîya Rayber Apoyî esas gênî, ameyî girewtene. Na çarçewa de do heta 11ê Tebaxe bajaranê Ewropa de bi siloganê ‘Ocalan rê Azadîye’ çalakîye bêrî viraştene. Wa herkes wayîrê çalakîyan bivejîyo û beşdarê çalakîyan bido.” MERKEZÊ XEBERAN