Grevê vêşanîye ke hepisxaneyanê Kurdistan û Tirkîya de dest pêkerdbî, roja xo ya 63. de dewam keno û her ke şono vilayê heme hepisxaneyan beno.
Grevê vêşanîye sey rojeve her çiqas ke sîya referandûmî de maneno, reyna zî xeylê bajarê Kurdistan, Tirkîya û Ewropa de çalakîyê piştîdayîşî yenî viraştiş. Reyna Komeleya Heqê Merdiman ya Şûbeya Anqara û sewbîna bajaran ra zî xeylê kesî seba piştîdayîşî kewenî girevê vêşanîye. Babete ser o Dayîkê Aştîye qisey kerdî.
Ganî ma wayîr bivejyî
Dayîka Aştîye Gulistan Ozgane va ‘ez veng dana çar parçeyanê Kurdistanî; 2 aşmî ra zêde yo ke hepsîyî grevê vêşanîye de yî. Ewro yan zî siba beno ke cenazeyî hepisxaneyî ra bivejyî. Cok ra ganî ma wayîrê xoverdayîşî bivejyî. Waştişê yewin yê hepsîyan wedarnayîşê tecrîdo ke Rayberê Şarê Kurdî Abdullah Ocalanî ser de yo. Dalpeyêk gonîya ma daxî bibo ma do hetê hepsîyan de bibî. Wa ti kes nêvajo qey ê bêwayîr î. Des kurdî şonî herinda înan de bi hezaran yenî.”
Ozgane dewamê qiseykerdişê xo de va ‘ganî her kes destê xo bideko bine kerrayî’ û wina domnaye: “Ganî ma vera zulmî de bêvengîya xo bişiknî. Zulmo ke bi serran o vera kurdan de beno, prosesê peynî de zî domîyeno. Ma bi rûmetê xo kewtî mîyanê têkoşînî. Ma do têkoşînê xo zî, erdê xo zî canêverdî. Wa Erdogan baş bizano ke heta kurdêk daxî bibo, têkoşînê ma dewam keno.”
Ez sey dayîkêk grev de ya
Dayîke Munube Koça ke grev de ya zî wina va: “Grevê vêşanîye xeylê hepisxaneyan de dewam kenî. Ez zî sey dayîkêk grev de ya. Ez veng dana heme şarî, wa hesas têbigêrî û bêveng nêmanî. Wa êdî domanê ma nêmirî. Ma pey heme hepsîyanê xo de yî û ma do heta peynî piştî bidî hepsîyan. Wa dewlete zî êdî bêvengîya xo xira bikero.”
ŞÛJIN/ANQARA