Bi fermanê Wezîrê Karanê Zereyî Horst Seehoferî Weşanxaneyê Mezopotamya û Mîr Muzîk 12ê Sibata 2019 de ameybî qedexekerdene û berê sazgehan mor bîbî. Par polîsan 2 reyî eştbî serê nê sazgehan ser û kitabê musnayîşê Kurdkî, kitabê domanan ê bi Kurdkî û kitabê tarîxî zî tede dest naybî xeylî kitaban ser.
Aşma Tebaxe de Hambûrgê Almanya ra weşanxaneyê Unrast-Verlagî, Awusturya ra weşanxaneyê Manelbaum Verlagî û Swîsre ra weşanxaneyê Edîtîon 8î, seba piştîdayîşê Weşanxaneyê Mezopotamya dest bi kampanyayêk kerdbî. Kampanyaya ke bi nameyê ‘Vera sansûrî de piştîdayîş û projeyê azadîya weşanî’ de her hîrê weşanxaneyî wazenê ke kitabê Mezopotamya yê ke hetê polîsan ra ameyî destsernayene înan ra tayînan newera bi nameyê ‘Edîtîon Mezopotamya’ bidê weşanayene.
Ame zanayene ke her hîrê welatê ke Almankî yena qiseykerdene de kampanya rê zaf eleqedarî esta. Organîzatoranê kampanya ra Weşanxaneyê Manelbaûmî da zanayene ke pereyê ke destê înan de mendî ê do seba mesrafê doza Weşanxaneyê Mezopotamya xerc bikerê. Yeno plankerdene ke kitabê ke ameyî weşanayene do biresê Fûarê Kitaban ê Mîyannteweyî ke do 16ê Teşrîna Peyêne de bêro destpêkerdene.
Wa kulturê Kurdan rê hurmet bêro ramojnayene
Piştîkaranê kampanya ra yewe zî Vervatoxê Kulturî yê Partîya Çepe ya Almanya Sîmone Barrîentose ya. Barrîentose va ‘kulturê Kurdan û têkoşînê azadîya Kurdan pabesteyê yewbînan ê û wina va: “Pawitişê nê kulturî berpirsîyarîya ma ya sîyasî ya. Bi qedexeyê Hukmatê Federelî na berpirsîyarîye nêameye caardene û heman wextî de heqê azadîyê fikir û weşanî yê esasî yê qanûnê bingeyênî zî ameyî bipaykerdene.”
Kitabheskerdoxî eşkenê nê hesabî ser ro piştî bidê nê projeyî: Verein z. Forderung kurdischer Kultur e.V. i.Gr. / IBAN: DE78 4306 0967 1011 1214 00 / Verwendungszweck: Edition Mezopotamya.
FRANKFURT