Hemserekê Komeleya DFGyî Serdar Altanî vat Kurdîstan de û Tirkîya de teda û şîdetê vera rojnamegeran bîyî zêde û îfade kerd ke seba kêmkerdişê înan hewce dî ke komeleyêke awan bikerê.
Komeleya Rojnamegeran a Dîcle Firatî (DFG) Amed de ameye awankerdene. Hemserekê DFGyî Serdar Altanî armancê komeleye û xebatanê ke do bêrê kerdene ser o ANF reyde qisey kerd. Altanî ard ziwan ke Kurdîstan û Tirkîya de zêdîyayîşê teda yê vera xebatkaranê çapemenîye ra dima seba ke paştî bidê yewbînan û heqanê rojnamegeran bipawê hewce dî ke komele awan bikê.
Seba rêxistinbîyayîşê rojnamegeran firsend o
Serdar Altanî vat: “Kurdîstan û Tirkîya de rojnamegerî mîyanê meseleyanê zaf pîlan de yê. Sîstem bi taybetî rojnamegeran keno hedef û nêwazeno vengê înan bivejîyo. Çira? Seba ke vengê komelî zî nêvejîyo û komel rastîyan ra dûr bibo. Rojnamegerê ke mîkrofon, kamera yan zî makînaya fotografan gênê xo destî û vejîyenê meydanan rastê hezar zor û zehmetîyan yenê. Seba ke ma vengê rojnamegeran xurtêr bikê ma DFG awan kerd. DFG seba rêxistinbîyayîşê rojnamegeran firsend o. Ma wazenê meseleyanê rojnamegeran zî çare bikê. Bi rêxistinbîyayîşî ma eşkenê pêro teda û şîdetê vera rojnamegeran wedarê. Na çarçewe de ma awankerdişê DFGyî sey hewceyêk dî.
Perwerde seba ma esasêk o
Mabênê 4-5 mengan de ma do kongreya xo serûber bikê û endamanê xo biweçînê. Her menge ma do raporanê binpaykerdişê heqan eşkera bikê. Reyna ma do xebatanê perwerdeyî zî bikê. Perwerde seba ma esasêk o. Komeleya ma do biba veng û rengê rojnamegeran. Kurîstan û Tirkîya de bi desan rojnamegerî tepişte yê û zîndanan de yê. Bi nê hawayî ma do paştî bidê rojnamegeranê tepişteyan.
Ma do têkilîya xo bi dezgehan, komeleyan û sazgehanê rojanemegeran reyde xurt bikê. Ma do xîret bikê ke xebatêka hempare bêra kerdene. Bi nê hawayî ma do rêxistinanê rojnamegeran ê mîyanneteweyîyan reyde zî têkilîyan bikê. Ma venga rojnamegeran danê ke berê ma abikê û bêrê bibê endamê ma. Çunke nqa komele yê rojnamegeran a û keyeyê înan a. Her kes bêşertêkî eşkeno bibo endam.
AMED