DENÎZ ÎKE / ANF/AMED
Hemserekê HDPyî yê Amedî Zeyyat Ceylanî hêrişê dewleta Tirkî yê vera Başûrê Kurdistanî û piştîdayîşê hukmatê Başûrî ercna. Ceylanî vist vîrî ke dewleta dagîrkere seba ke Kurdî heq dest mefînê hêrişê her hetî kena.
Ceylanî qiseykerdişê xo de wina va: “Dewleta Tirkî herra bimbareke ya Kurdistanî sey herra xo vînena û na çarçewe de hêrişê destkewteyanê Kurdan kena. Tirkîya wazena ke Sûrîye, îdlîb û Heleb de bi rayîrê çeteyanê OSO îdareyê herême kontrol bikero. Kişta naye de wazena ke xeta Mûsil, Kerkûk û Şengalî bigêrê binê kontrolê xo. Planê Tirkîya ya ke bi operasyonê Xakukê dest pêkerd zaf hîra yo. Bi nê operasyonî wazena ke Îran û Îraq bigêro kişta xo û hêrişê Kurdan bikero.”
Ceylanî dîyar kerd ke hedefê AKPyî de çareserîye çin a û wina va: “Rixmê heme hewldayîşê Rayberê Şarê Kurdî Abdullah Ocalanî yê çareserîye îqtîdar şerî de israr keno. Dewleta Tirkî bi kayan û metodanê qijan wazena ke Kurdan bixapêno. Nê kayê înan ser nêkewtî. Hêrişê Vakurî çirey nêvindetî. Serkewtişê Rojawanî ra dima hêrişê Rojawanî kerd. Ewro zî hêrişê Başûrî kenê. Operasyonê Xakurkê operasyonêko normal nîyo. Tirkîya wazena ke mabenê çar parçayanê Kurdistan de pêrodayiş vejîyo û şerê wayeûbirayî bêro destpêkerdene. Dimayê Kerkuk û Efrînî wazena ke Başûrî îşxal bikero. Tîya wezîfeyêko gird keweno PDK, YNK, Têgêrayîşê Goranî û Komala Îslamî. Ganî mekewê dama Tirkîya.