MUHAMMED DOGRU / MA / STENBOL


Tecrîdo ke Îmrali de Rayberê Şarê Kurd Abdullah Ocalanî ser de esto, bi hawayo girankerde yeno domnayîş. Nizdîyê 2 serrî yo ke ti xebere Ocalanî ra nîna girewtiş. Ser de zî aşmêk ra ver medyaya komelkî ser ro tayê xeberî ameybî parekerdiş. Nê xeberan ver etirîyayîşê kurdan hîna zêde bîyo. 

Heto bîn ra Komîteya Vernîgirewtişê Muameleyo Xirab û Îşkenceyî ya Ewropa (CPT) ke verê cû çend reyan Îmrali de Ocalanî zîyaret kerdbî, tewr peynî 28-29ê Nîsana 2016î de yewna rey Îmrali zîyaret kerdbî. Labelê CPT o wext ra nata bêveng o. Babete ser o huqûqnasî qisey kerdî. 

Verfekê Platformê Huqûqnasê Azadîwaştoxî (OHP) avûkat Serhat Çakmakî va ‘Verê cû CPT çend reyan ameyî Tirkîya û raporî amade kerdî’ û wina dewam kerd: “Raştîya xo de xeylê neheqîyan tespît keno. Eke ewro neheqîyê ke Îmrali de estî, nêrî derbazkerdiş, ti manaya tespîtkerdişê neheqîyan çin a. Eke wina bibo, o wext CPT heta peynî wa şêro bêro, çi manaya ci esta? Ma do vera tecrîdî de bêveng nêmanî û ma do tayê kampanyayan bidî destpêkerdiş. Eke Tirkîya ameyoxêka azade wazena, bero ke şêra, berê Ocalanî yo.”


CPT goreyê menfîetanê xo hereket keno

Avûkat Mahmut Taşçiyî zî va ‘CPT ewro çîyê ke eleqeyê xo huqûqî reyde çin o, keno’ û wina domna: “Wexto ke yeno hesabê ci huqûqnasan erşaweno, rapor weşênano. Labelê eke çîyo ke bizano zirar dano menfîetanê ci, bêveng nêmaneno. Helbuk dezgehê ke heqê merdiman reyde eleqeder benî, ganî dewletan ra cîya eleqeder bibî. CPT seba ke menfîetanê xo fikirîyeno, Îmrali ser o bêveng maneno. Ewro CPT vera tecrîdî de bêveng maneno û bi no hawa suc keno. Cok ra ganî na rewşa CPTyî bikirêşîyo Mehkemeya Heqê Merdiman ya Ewropa (AÎHM). Reyna ganî herkes vera tecrîdî de têkoşîn bido.”


Bawerîya merdimî nêmanena

Avûkat Îknur Alcane zî wina va: “Seba zîyaretkerdişê CPTyî yê Îmrali lazimî bi tesdîqkerdişê Tirkîya çin a. Na rewşe de CPT bi hawayo sîyasî hereket keno û bêhetîya xo vînî keno. Ewro herkes seba Ocalanî etirîyeno. Ancax CPT şêno nê etirîyayîşan biwedarno. Labelê nêkeno. Bi no hawa CPTyî rê bawerî nêmenda. Nê prosesî ra dima ma do muracatê tayê dezgeyanê mîyanneteweyîyan zî bikerî. Birêz Ocalan şexsîyeto ke hetê mîlyonanan ra sey îrade yeno qebulkerdiş o û ancax o eşkeno Tirkîya de vernîya aştîye biakero. Cok ra ganî Birêz Ocalanî reyde pêvînayîşî dest pêbikerî. No seba aştîya Tirkîya gama sifteyîne ya. Ganî heme hetê komelî nêyî bivînî.”