Hemserekê Konseyê Caardişî yê KCKyî Cemîl Bayikî derheqê hedefê PKKyî, rolê ci yê Rojhelato Mîyanên û pozîsyonê Ewropa de Muxabîrê rojnameyê înternetî û kovara aşmane ya bi nameyê Tîchys Eînblîckî ra Tomas Spahnî rê qisey kerd û vînayîşê xo ard ziwan.

Hemserekê Konseyê Caardişî yê KCKyî Bayikî destpêkê qiseykerdişê xo de dîyar kerd ke bi hawayo ‘rêxistinêka terorîst’ namekerdişê welatanê Ewropaye yê PKKyî qeraranê sîyasîyan ver bîyo û wina va: “PKK bi qerarêko sîyasî mîyanê ‘lîsteya rêxistinê terorî’ de ameyo bicakerdiş. Serranê 90î de şerêko lêmin û giran Kurdistan de ameyêne meşnayîş û qasê 17 hezar kesan hedîseyê ‘kerdoxê ci dîyar nîyo’ de ameyî kiştiş, bi hezaran dewî ameybî vengkerdiş û veşnayîş, bi hezaran kesî ameyî remnayîş û îşkence bi înan ame kerdiş. Seba serewedarnayîşê vera nê kerdişan de lazimî bi kurdbîyayîşî çinêbî. Cok ra serra 1993 de kurdê ke Ewropa de cuyayênê, vera nê kerdişan de dest bi çalakîyanê protestoyî kerdî.”

Bayîkî dewamê qiseykerdişê xo de va ‘seba ke rayapêroyî yê Ewropa nê kerdişan hîna baş fam bikerî, o wext otobanî ameyênê dagîrkerdiş’ û wina dewam kerd: “Çimkî Ewropa zî destek dayêne no şero lêmin. Wexto ke merdim hovîtî û kerdişê ke Kurdistan de ameyênê kerdiş ra biewnîyo, o wext merdim fam keno ke kurdan Ewropa de çira çalakîyanê winasîyan viraştênê. Beno ke çalakîyê qanûnî nêbîy, merdimî çalakîyan ver eciz bîyî. Labelê Kurdistan de qirkerdişî bîyênê, dewê ke merdimî tede ameybî dinya û pîl bîybî, heme ameyênê veşnayîş û rijnayîş. Gelo no ameyêne çi mana? Kişîyayîşê hende merdiman ameyêne çi mana? Eke ma kerdişanê teberê merdimîye û zext û zulmê dewleta tirk bîvajî, do wendoxî şoq bibîy. Loma ganî Almanya nê şert û mercê ke çalakî ameyî viraştiş, fam bikera.”


PKK girêdaye yo 

Bayîkî ard vîr ke dinya de xeylê reyan şer qewimîyayî, têkoşînê rizgarî yê neteweyî ameyî meşnayîş û bitaybetî seserra 20. de şerê winasî xeylê reyan qewimîyayî. Bayîkî bale ant peymanê ke PKK esas gêno ser û wina va: “Eke cigêrayîşî bêrî kerdiş do o wext bêro vînayîş ke şerê ke seserra 20. de qewimîyayî û şerê têkoşînê rizgarî yê neteweyî de yê ke tewr zaf goreyê heqê merdiman hereket keno, PKK yo. Heta nika PKK qet çalakîya ke sîvîlan hedef bigîro, nêkerdo. PKK çalakîyanê winasîyan tim şermizar kerdo. PKKyî serra 1994î de Peymana Şerî ya Cenevreyê tesdîq kerd û soz da ke do goreyê na peymane hereket bikero. Ê wextî ra nata girêdayeyê sozê xo yo.”


Gani bibedilno

Bayikî qala endambîyayîşê NATO yê Tirkîya kerd û wina va: “Tirkîya endamê NATO ya. Cok ra wexto ke vera Tirkîyaya ke endamê NATO ya de têkoşînêk bêro dayîş, nizdîbîyayîşê winasî yê endamanê bînan yeno famkerdiş. Labelê mîyanê rewşêka ke şero serdin qedîyayo û fonksîyonê NATO bedilîyayo, domnayîşê nizdîbîyayîşê şertê şero serdin raşt nîyo. Têkoşîn û çalakîyê PKKyî orte de yî. PKK rêxistinêka akerde ya. Sewbîna ti rêxistine qasê PKKyî akerde nîyo. PKK bi hawayo akerde xo û teberê xo rexne keno. Cok ra ganî cîhanê rojawanî û bitaybetî Ewropa vera PKKyî de nizdîbîyayîşê xo bibedilno. No do goreyê menfîetê înan bo zî.  Lazim o bitaybetî Almanya ganî vînayîşê xo yê vera PKKyî de bibedilna.” 



Wa Almanya nêbo ortax

Bayikî qiseykerdişê xo de qala ortaxîya Almanya û dewleta tirkî kerd û wina va: “Almanya waştişanê dewleta tirkî ana ca û no zî nîşanê ma dano ke Almanya ortaxê dewleta tirkî ya. Ganî Almanya fek nê ortaxîya xo ra vera bido. Çimkî polîtîkaya dewleta tirke ya vera kurdan de polîtîkaya qirkerdişî ya. Eke Almanya polîtîkaya tirkan wina nêvîno, o çîyêko bîn o. O wext o şermê Almanya yo. Kurdê Almanya û Ewropa sey kurdê Tirkîya Tevgerê Azadî ra hes kenî. Kurdê Almanyayî mîyanê rêxistinêka demokratîke û qanûnî de yî. Kurdê ewja goreyê qanûnê Ewropa xo rêxistine kenî û na çarçowa de zulmo Kurdistan de beno şermizar kenî. Kurdan bi ti hawayî vera Almanya de vindetişêko negatîf nîşan nêdayî. Hêzê ke şopa Rayber Apoyî de yî, ewro Rojhelato Mîyanên de vera DAIŞî de şer kenî. Bi hezaran ci ra şehîd bîyî. Ewropa û Almanya herinda ke goreyê dewleta tirk hereket kenî, wa goreyê hîsê merdimê ke vera çeteyanê DAIŞî de şer kenî û canê xo feda kenî, fam bikerî.”


 BEHDÎNAN - ANF