Grevê vêşanîye yê hepisxaneyan nika resayo merhaleyêko krîtîk û teberê hepisxaneyan ra zî piştî dîyeno grevî. Dayîk û dormeyê tepişteyan Komeleya Heqê Merdiman ya Şûbeya Anqara (ÎHD) de seba piştîdayîşî grevê vêşanîye, grevêk bimohlet daybî destpêkerdiş. Babete ser o Wekîla Serekê Komîsyonê Heqê Merdiman yê Meclîsî û Parlamentera CHPyî Şenal Sarihane, Temsîlkara Federasyonê Komeleya Piştîdayîşê Keyeyê Hepsîyan Havva Ozcane û Dayîka Aştî Munîbe Koçe qisey kerdî.
Cinîyan ra Ozcane va ‘çalakî ameya duştêko krîtîk û her vîste de beno ke xebera mergî bêra’ û wina domnaye: “Ma wazenî ke wa bi hawayo lez mudaxaleyê rewşe bêro kerdiş. Eke hepisxaneyan ra xebera dejine bêra, o wext do rewşe hîna xirab biba.”
Ganî çareser bibo
Parlamentera CHPyî Sarihane zî va ‘problemo tewr muhîm yê pawitoxê heqê merdiman û huqûqnasan pawitişê cuya merdimî yo’ û winan dewam kerde: “Talebê sîyasî çîyê ke ma çareser bikerî, nîyî. Labelê teberê nînan de heme problemê merdimîye yê ke ganî bêrî çareserkerdiş î. OHAL tim hepisxaneyan rê 2 qat zext û teda ardo. No het de verê ra têkoşîno ke yeno dayîş, esto.”
Ma do çareserîyêk bivînî
Sarihane dewamê qiseykerdişê xo de va ‘ez eynî wext de Wekîla Serekî ya Komîsyonê Heqê Merdiman yê Meclîsî ya, labelê komîsyonî ra qerarêk do nêvejîyo’ û wina domnaye: “Zafaneyê ci destê ma de nîyo. Ez do bi hawayo lez Wezîrê Edaletî reyde pêvînayîş bikera. Zîyaretê ke mi viraştî, haya partîya mi zî tira esta û ma do çareserîyêk bivînî.”
Çareser nêbeno
Munîbe Koçe zî qiseykerdişê xo de va ‘Wa muzakere dest pêbikerî; çimkî wextê muzakereyan de merdimî nêmerdênê. Wa şêrî hetê Rayber Apoyî, wexto ke o keweno dewre, kes nêbermeno. Waştişê ma no yo. Heta ke muzakereyî dest pênêkerî, ti problem çareser nêbeno. Ma Mudirîya Pêroyî yê Hepisxaneyan reyde pêvînayîş viraşt, la ewja ra cewabêk nêame. Verê zî wina bîbî. Eke biwazî ma amade yî ke mabênkarî bikerî. Ma do zîyaretan zî bikerî. Ma fikirîyenî ke şêrî Şakranî zîyaret bikerî.”
DÎHABER/ANQARA