Tarîxê tevgerê ma de zaf demanê çetîn ameyo ciwîyayîş. Her dem û serdem zî goreyê taybetmendeya xo qadro û şerwananê xo afirnayo û veto asan. Senîn ke qadroyanê hereketan serdeman rayîra benê, serdemê zî pîvananê qadrotey ê ya demî ronenê raşte. Bêguman tayîn xislet û taybetmendeya qadroteyî esto ke goreyê serdeman nêbedelyenê; serdem se beno wa bibo qadro cuyê xo goreyê ya xislet û taybetmendeyan  tanzîm kenê. 


Xosereya demokratîk awan bikerê

Ewro roj şar û tevgerê ma demêde zaf çetîn ra vîyareno. Vakur û Rojawanê welat de şerêdo zaf giran ameyo dest pêkerdiş û bi heme dijwareya xo domîyeno. Ma do na şerê giran ra senîn hewa bivejîyê? Qewetanê Mîyanneteweyî sey seserra 20’ine do bieşkê welatê ma reyna lete û kamîya ma ya neteweyî înkar bikerê? 

Rûxmê nêyî ma do bieşkê xosereya demokratîk awan bikerê û bi na rayîr him rayverê xo him zî şarê xo yê belengaz biresnê azadîya xo?

Verpersê nê persan vindertişê ma de nimite yo. Qadro bi ferasetêdo fedayî ristê xo kaybikerê se azadî, sey verî bilebitîyê se çînbîyîş pabeyê ma yo! Ma ameyê heyamêdo ana ke nêyî ra tepa fetelîyayîş çînyo.

Tîya/îta de ruhê Cizîrî ganî ma hemînan rê bibo finak. Duştê xoverdayîşê Cizîrî, ruhê serdema neweyî yo. Eke heme qadanê şorişî de ma bieşkê bi ya rihî şer bikerê se, rîyê hardî de quwetek ke bieşko ma çîn bikero çînyo!


‘Cizîr de qetlîyam virazî ya’

Cizîr de se bî? Tayînî eşkenê vajî ke ‘Cizîr têk şî’, ‘Cizîr şikîya’, ‘Cizîr de qetlîyam virazîya’ û sewbîna. Goreyê min Cizîr ne têk şî, ne şikîya û ne zî qetlîyaman ra ame vîyarnayîş; uca de destanê azadîya merdimîye ame nusnayîş. Xoverdayîşê ciwanê Cizîrî tarîxê ma de rîpelêdo newe yakerd, pîvananê fedayîya PKKe tayîna bîn berz kerd.

Hetê taqtîkî ra merdim eşkeno nîqaş bikero. Binê ya cêrzemînan de çi gureyê hentay embazan estbî, semedê dirbetinan çirê cayanê ewle nêamebî hadrekerdiş û sewbîna. Dezge û sazîyanê eleqedar do nê mijaran ser o de vinderê. Çîyo ganî keno ke ma ser o de bivinderê ruhê xoverdayîşî yo.


Derbe werdo de dişmenî ro dê

Prosesê şer û şorişan de şehîddayîş, yan zî ge ge tepakewtiş, nêyeno maneya têkşîyîşî. Beno ke ti yew ca de bi seyan, bi hezaran şehîd bidê û xo ûca ra tepa zî biancê. Çîyo muhîm radestê dişmenê nêbîyayîşî yo. Ti derb biwarê zî eke ti xo radest nêkerdo se, dima ra eşkenê xo arêdê pê ser û reyna bêrê cayo ket o derbe werdo de dişmenî ro dê! 

Rewşa Cizîra Botan zî ana yo. Dişmen bi aşman nêeşkîya dekewo mîyanê şaristanî. YPS/J uca de sey kay lêhengan xo ver o da. Tewr peynî zafînê ci dirbetin, nezdîyê di sey embazî binê hîrê cêrzemînan de asê mendî. Dewleta tirk bi hewteyan waşt ê embazan radest bigîro. Vatêne; ‘Wa destê xo hawanê, cêrzemînan ra yew yew bivejîyê û teslîm bê; ana nêkerê se ma zî ambulans nêerşawenê.’ Armancê dişmenî bi radestgirewtişê yê embazan ruhê xoverdayîşî şiknayîş bi. Embazî eke sey ke înan waştênê radest bibîyêne se, ê de nêyî biantêne kamerayan û heme telewîzyonê xo de bi rojan bidayê mojnayîş ke senîn bi seyan YPG/Jyijî xo eşto bextê dewleta tirk!

Ê embazî zî nêyî zanitêne. Sewata êyî zî nêameyî kayanê dişmenî. A dîmenê îxanet û teslîmbîyîşî nêdayî û vileyê şarê kurd dişmenê xo ver de çewt û war nêkerdî.


KENAN AVCI / Zîndanê Tîpa T a Sêwregî




Rayîrê serkewtişî


Ê embazî zanitêne ke dişmen do tewr peynî yê hemînan şehîd bikero. Çimkî bi rojan, bi hewteyan vêşan û têşan mendî, bin varnayîşê topan de xo ver o dayî; reyna zî vîryardareya înan ê şorişger de yew çilke zî kemî nêbî. Çîyo ke dişmenî xînt û har keno, no yo! Fam nêkenê. Enka vanê; ‘Senîn beno ke di nê şert û mercan de eşkenê hentay bivîryar vinderê? Sewata êyî zî yê embazan bi haweyêdo hovane kiştî û bedenê înan ê şêrîn him veşnayî û him zî lete lete kerdî.’

Pekî ma do nêyî ra çi fam bikerê, yê embazî waştî ma rê peyamêdo senîn bidê? Goreyê min şehîdanê Cizîrî waştênê ma rê vajê ke; ‘Goştê şima bêro lete lete kerdiş zî ganê şima bi adiran bêro veşnayîş zî, sey Kerbela şima bê awe berê ternayîş zî RADEST MEBÊ, XO VER O BIDÊ’ Rayîrê serkewtişî yo no! Şehîdanê Cizîrî bi sifir radestbîyîşî serdemêdo newe awan kerdî.