Çalakîyê grevê vêşanîye ke vera tecrîdî de dîyayî destpêkerdene, dewam kenî. Heyetêk ke tede parlamenter û sîyasetmedarî estbî, Wezîrê Almanya Nîels Annenî reyde pêvînayîşêk viraşt. Wezîr Annenî waşt ke wa tecrîd wedarîyo û zextê zîndanan biqedyê.

Vera tecrîdê serê Rayberê Şarê Kurdî Abdullah Ocalanî de çalakîyê ke xeylê hetan de dest pêkerdbî, dewam kenî. Çalakîya grevê vêşanîye ya Leyla Guvene roja 184. de, çalakîya Nasir Yagizî roja 171. de, çalakîya hepsîyan 146. de, çalakîya Îmam Şîş û 14 xoverdayoxanê Strasbourgî roja 145. de dewam kena.

Heyetê HDPyî yê bi serekîya hemsereka HDPyî Pervîn Bûldane paytextê Almanya Berlîn de pêvînayîşan kerd. Roja peyêne de heyet Wezîrê Dewlete yê Almanî Niels Annen de dir ame têhet. Parlamentera Êlîhî Feleknaz Ûca, parlamentero verên ê Şirnexî Faysal Sariyildiz, hemşaredara verêne ya Cizîre Leyla Îmrete û temsîlkarê HDPyî yê Ewropa Farûk Dorû zî tewrê kombîyayîşî bîyî.

Pêvînayîş de meseleyê Kurdistan û Tirkîya, bitaybetî zî tecrîdê serê Rayberê Şarê Kurdî Abdullah Ocalanî gerîyayî dest. Wezîr Anneno ke endamê Partîya Demokratan a Sosyale (SPD) yo ard ziwan ke ê zî wazenê ke tecrîd wedarîyo û zextê zînadananê Tirkîya biqedîyo. Pêvînayîş ra dima wezîr Annen hesabê xo yê medyaya sosyale ser a îzehet da û va ‘ma hemseraka HPDyî Pervîn Bûldane dir pêvînayîş viraşto û dereheqê weçînitişê Stenbolî û demokrasîyê Tirkîye ser o qisey kerdo’.

Wa Almanya rolê xo kay bikero

Temsîlkarê HDPyî yê Ewropa Farûk Dorûyî zî qisey kerd û wina va: “Annenî dîyar kerd ke sîyasetê înan vera tecrîdî de yo û do wina dewam bikero. Ma zî derheqê grevê vêşanîye de zanayîş da û ma înan ra waşt ke rewşa xoverdayoxan krîtîk a û wa Almanya vera naye de bivindero. Reyna ma da zanayene ke sey endamê Konseyê Ewropa rolê Almanya gird o û ganî vera tecrîdî de nê rolê xo kay bikero.”

   

Konsolosê ma grevan ser o pêvînayîşî kerdî

Heto bîn ra Parlamentoyê Kralîya Yewbîyaye de roniştişêk ame viraştene û ewja de babetê ke ameyî munaqeşekerdene ra yew zî tecrîd bi. Roniştiş de Parlamentera gallerije Lîz Savîlle Robertse persêk persê Serekwezîr Theresa Maye kerd. Parlamentere qisey kerd û wina va: “Îmam Şîşo 32 serre 144 rojî yo ke grevê vêşanîye de yo û xeylê hetanê dinya de zafî kesî grev de yî. Heqê Ocalanî hetê dewleta tirkî ra bi hawayo aşkere yeno îxlal kerdene. Ma 48 parlamenterî seba ke dewleta tirkî ser o zextan bikero, Wezîrê Karê Teberî yê Kralîya Yewbîyayeyî rê nuşt. Ez bawer kena ke Serekwezîre zî ferqê muhîmîya meseleyî de ya. Gelo Birêz Serekwezîre do na mesele ser o bivindero?”

Serekwezîre Maye da zanayene ke ê bawer kenî ke Tirkîya do derheqê zîndanan de bi hawayo adil, zelal û bi rêzdarîya huqûqî bigîro dest û wina dewam kerde: “Birêz parlamentere qala meseleyêka muhîme kerde. Konsolosê ma yo ke Anqara de yo, na mesele ser o selahîyetdaranê tirkan reyde pêvînayîşî viraştî. Ma do heqanê xoverdayoxan bipawî.”

 

AMED