Pawitoxê Heqê Merdiman Akin Bîrdalo ke Grûba Dîyalogî de zî ca gêno, va ‘referandûm de yê ke vanî nê, yenî astengkerdiş’ û wina domna: “Heta ke çapemenîye azade nêba, merdim nêeşkeno qala demokratîkbîyayîşê referandûmî bikero.”
Bîrdalo ke seba Hemserekê Şaredarîya Bajarê Girdî yê Mêrdînî Ahmet Turko ke çend rojî verê amebî tehlîyekerdiş zîyaret bikero şibi Mêrdîn, derheqê referandûmî de qisey kerd. Bîrdalî va ‘heq û azadîyê bingeyînî nêbenî babeta referandûmî’ û qiseykerdişê xo wina domna: “Nê 18 madeyê ke benî babeta referandûmî, îdareyê yew merdimî û otorîteya grûbek ser o vindenî. Helbûk na cografya de nasname û bawerîyê cîya cîyayî estî. No qanûno bingeyî qanûno bingeyîyêko her kes ci rê wayîr bivejîyo, metnêko winasî nîyo. Cok ra Tirkîya nika nuqtayêka krîtîke de ya. Referandûm de 2 hetî estî labelê yê ke rewşa înan xirabin a, yê ke bêqerar î. Çimkî ê do tena bimanî.”
Bêveng maneno
Bîrdalî dewamê qiseykerdişê xo de va ‘hemsesrekê HDPyî zî tede 12 parlamenter û 54 hemserekê şaredarîyan tewqîfkerde yî û 73 şaredarîyan rê qayûm tayîn bîyo’ û wina dewam kerd: “Ewropa vera nînan de bêveng a. Helbuk seba înan weçîniyayîşê merdiman seba demokrasî, şertêko gird o. Çi heyf ke ewro hende merdimê ke ameyî weçînayîş, tewqîfkerde yî û Ewropa bêveng a. Prosesêko winasî de heqê merdiman yê girewtişê xebere esto. Nika hêzê demokratîkî kampanyaya ‘nê’yî dayî destpêkerdiş. Labelê do kampanyaya xo senî biresnî şar? Kanalî ameyî padayîş û ma do bi rayîrê şima û medyaya komelkî xo îfade bikerî. Hetta ke çapemenî azade nêba, referandûm zî demokratîk nêbeno.”
Bîrdalî peynî de wina va: “Her çiqas ke hende zext û qedexeyî estî, reyna zî îxtîmalê vejîyayîşê ‘nê’yî berz o. Tayê vatişê ke vanî ‘kurdî do vajî ya’ raşt nîyî; çimkî no referandûm seba kurdan firsendê hesabpersayîşî yo. Beno ke tayê provakasyonî zî bibî. Ganî ma firsend nêdî çîyê winasîyan û ma qala projeyê xo yê cuyayîşê pîya bikerî. Cok ra ma veng danî her kesî wa 16ê nîsane de vajî nê.”
DÎHABER/MÊRDÎN