Ahmet Turk ke seba yewîya neteweyîya kurdan xeylê reyî kewt hewldayenan, ard ziwan ke ganî kurdî na reyî no firsendê tarîxî destê xo ra nêremnê. Turkî waşt ke her partî menfîetanê ortex yê Kurdan de bîbê yew û raştîya xo de israr nêkerê, nezdîyê pê bibê.
Sîyasetmedarê kurd Ahmet Turkî hayr ant hewldayenanê verênan ser û wina dewam kerd: “Ma reyekê Hewlêr de seba Kongeya Neteweyîya ya Kurd amey pêhet la çi heyf ke, rîwalê tayî faktoran no yew nêame ca. Sebebê nayî zî pêemelnêkerdişê partîyanê kurdan û rolê quwetanê teber bi. La ewro muhîmîya yewîye vejya orte.”
‘Ganî qerarê xoserîye rind bîro fikirkerdiş’
Turkî babeda referandûmê xoserîye yê Başûrê Kurdistan de zî vînayîşê xo ard ziwan û dîyar kerd ke ti yew partîyêka kurdan zî vera xoserîyê. Turkî waşt ke qerarê xoserîyê rind bîro fikirkerdiş û persê “Do xoserî çi bîyaro û çi bibo? Do referandûmî ra dima xoserî virazîyo, yan nê? kerd.
Sîyasetmedar Ahmet Turkî hayr ant qezencanê Başurê Kurdistanî ser û wina va: "Başurê Kurdistanî de xeylê bedelî amey dayen. Enfalan de xeylê kesan weşîya xo kerd vinî. Nika Kerkûk û Şengal ser hikumeta Iraqî yê, destpêke ganî referandumê nê hurdî sûkan bîro viraştiş. Xoserî de nê hurdî sûkî dê girêdayê kotî bê?”
‘Ganî qerar parlemento de bîro girewtiş’
Turkî nêxebetnayîşê parlementoyê Kurdistana Federal de zî qisey kerd û ard ziwan ke ganî qerarê xoserî parlemento de bîro girewtiş. Turkî vist vîrî ke partîyêke sîyasî tenya bi xo nêşkena na qerarî bigîro û va, “Ganî sazîyê sivîl ê civakî bîro goşdarîkerdiş. La ewro başur de parlemento nêşkeno kom bibo. Qerarekê bê parlemento do dima ra vernîya raya qiseyan akero. Eke meşt xoserî bica nîro do xeyalê kurdan bişikîyê.”
‘Ganî sifte leşkerê tirk Kurdistan ra bivejyê’
Turkî nêbîyayîşê quwetê pawitenê hewayî û erdî yê Başurê Kurdistanî zî vist vîrî û wina dewam kerd: “Quwetê pawitişê hewayî û erdî çin ê. 18 cayanê Kurdistanî de leşkerê tirk estê. Ganî verikîn leşkerê tirk bîrê vetiş. Do peynîya înan çi bibo?
Ahmet Turkî vist vîrî ke modelê xoserî seba parçeyanê bîn yê Kurdistanî mumkin nîyo û va, “Yo muhîm al û peykerêk nîyo, çiyo muhîm ronayîşê sîstema demokratîk o.
DÎHABER/MÊRDÎN