15ê Temmuze teşebusê derbe ra dima OHAL ame îlankerdiş û îlanbîyayîşê OHALî ra dima bitaybetî zîndanê Kurdistan û Tirkîya de kerdişê teberê merdimîye de her ke şono hîna zêde benî. Zîndanê Tîpa Tyî yê Dînarî yê Afyonî û Zîndanê Tîpa Tyî yê Tarsusî zî nê zîndana ra yî. 

Hepsîyo sîyasî Bawer Eyeyo ke nizdîyê 5 serrî yo ke Zîndanê Tîpa Tyî yê Dînarî de maneno, bi rayîrê telefonî zext û tedayê ke înan ser de yenî meşnayîş, keyeyê xo ra vato. Dayîka Eyeyî Saadet Eyeye qisey kerde. Dayîke qiseykerdişê xo de vatişê Bawerî arde ziwan û wina va: “Bawerî ma ra wina va; tîya de her roje zextî zêde benî û ma zî vera zext û tedayan de xover danî. Gardîyanî eştî koguşan ser de heta nivînanê ma heme çîyê ma bi kardîyan parçe kerdî.”


Berpirsîyar îdareyê zîndanî yo

Dayîke va ‘seba ke çimê Bawerî de problem esto, wazeno şêro nêweşxane. Labelê seba ke Bawer bi hawayo kelepçeyin tedawîye qebul nêkeno, ey muayene nêkenî û tepîya anî zîndan’ û wina domnaye: “Wexto ke ma şonî pêvînayîş, gardîyanî merdiman teşhir kenî. Wexto ke ma xo resnenî cayê pêvînayîşî, ma vînenî ke zextî xeylê zêde bîyî. Gardîyanî sey polîsanê tîmê taybetinan hereket kenî. 4 gardîyanî hepsîyêkî taqîp kenî. Tim ser sereyê ma de yî û heme çîyê ma şopnenî. Ez veng dana rayapêroyî, wa herkes nînan bieşnawo û veng bivejo. Eke çîyêk bêro sereyê hepsîyan îdareyê zîndanî berpirsîyar o.”


Rojnamegere qala Tarsûsî kerde

Xebatkara rojnameyê Azadîya Welatî ke bi Qerarnameyê Hukmê Qanûnî ame padayîş, Şîrîn Çobana ke Zîndanê Tarsusî ra tehlîye bîye, va ‘wexto ke ez tepişîyaya ewil mi berdî Zîndanê Zîndanê Tîpa Cyî yê Tarsusî, labelê 8 aşmî ra dima mi sewqê Tîpa Tyî kerdî’ û wina dewam kerde: “Ewja de ma dî ke hepsîyan erdî ra kirancenî û îşkenceyê înan kenî. Gardîyanî bi paşkulan pay sereyê embazanê camêrdan nayênê. Nê heme çimê mudurê zîndanî ver de ameyênê kerdiş. Wexto ke ma vera îşkenceyan de reaksîyon nawit, leşker û gardîyanan paşkul da ma ro. Embazêkî ma kamera ra ewnîya û va ‘no îşkence kamcîn edalet de esto?’ labelê gardîyan û leşkerî huyayî û vatî ‘heme kamerayî padaye yî, ti kes vengê şima nêeşnaweno’. Ma tim raştê tehdîdî ameyêne.”

Çobane dewamê qiseykerdişê xo de va ‘zîndan de grûbêka îşkenceyî ya bi nameyê A Takimi estbîye’ û wina domnaye: “Wexto ke ma newe şî Tîpa Tyî, ewja de rewşa înşaatî estbîye û ewja de awe daxî nêdîyayêne ma. Reyna zîndan de cilê tek tîpî ma ser de ameyêne ferzkerdiş.” 


Grevê vêşanî netîce da

Çobane bale ante çalakîya grevê vêşanîye ya ke ê daybî destpêkerdiş ser û wina va: “Roja 39. ya grevê vêşanîye de mudurê zîndanî waştişanê ma qebul kerd. Labelê dima ra reyna zî tayê gardîyanî kerdişanê xo yê kêfîyan domnayênê. Badê ke zîndanê Tarsusî zaf ame rojeve, îdareyê zîndanî tersa û êdî nêame ser ma de. Labelê ma ra dima vera xo dayî camêrdan û îşkence bi înan kerdî û ê eştî odeyê sîngerinan.” 


NAVENDA XEBERAN