Zey ke ma zanê Davutogluye çend rocî verî vat: “Mîyanberê ma û DAIŞe de 360 derece ferq esto” ke yeno famkerdiş her di zî nuqtayekî de resenê pê.
Xora ciwano ke Bismil de serreyê ey bi qaydeyê DAIŞe ame tirakerdiş, finakêkî nê ra yo ke ferq mîyanê înan de çiqas o. Ancî dimayo ke mitîngê şaristanê Wanî de têkşîyayîşê xo dî, hêrsan ra raştîya zerrey xo da teber û gefî ro şarê kurdî wendî û vat: “Eke ma nêbî îqtîdar ko ancî torosê sipî bivecyê raşte.” Serekwezîrî vat qey meerîfet torosanê sipîyan de yo û bi hewesêkî pîl na plana xo ard ziwan. Hem bi nê vatişê xo rayêka bîne kerdişê hikûmatê şerî yê serrê newayan teşhîr kerd. Vatişêke esto vanê: “Fikrê derwêşî çi bo, zikrê ey zî o yo.”
Ma bi ca amyayîşê nê vatişî rê bi vatişê serekwezîrî yê zey: “Zalimêkî ça bibo, ma ko verê ey de bê” bî şahid. (Herhalde yewo/a ke hay ro TIRanê sîlehan û elemanê ke înan çeteyanê DAIŞe rê peyda kerdê ra nêbîyo/a nêmendo/a! Şarê kurdî û heme şaranê bînan meramê zerrêy înan rayêka bîne dî ke kurdan ser de fikrê înan çi yo. La ma gafanê înan hetêke de verdê eyro ey gefanê ke ro şarê kurdî kenê ramojtişê tersê înan ê derheqê yewîtî û tifaqê şarê kurdî û heme şaranê bînan o.
Ey zanê na yewîtîya şaran, xirabîyayîşê îqtîdarê înan o. Ey zanê ke na hêza partîya HDPe temînatê ardişê aştîye ya mîyanberê şaran o. 7’ê hezîrane de şarê kurd û şarê bînan ê Tirkîya tercîhê xo hetê çareserîya demokratîk, dîyalog û aştîye de kerd. La AKPe no tercîhê înan qebûl nêkerd, nêverda berê meclisî abibo û waşt îradeyo ke înan dayo ro bi şerêkî bêqayde vila bikero û înan tercîhê înan ra poşman bikero. La di xebatanê weçînayîşî de ke nê rocan de yenê kerdiş, yeno dîtiş ke şar tercîhê xo de bi biryar o û ko 1’ê Teşrîne de bi îradeyê xo heme şerwazî û gefanê înan veng veco. Helbet ey ko hewl bidê sindoqan de hîle û sextekarî bikerê, aye ra sebeb lazim o şarê ma û heme şarê aştîwazî çimê xo sindoqanê xo ra nêkiwê û heta girotişê encamî wayîr ro venganê xo veciyê.
Hêvîya ma ya amyayîşê aştî û demokrasîye ya serê na axe pîl a û ko verpersê ma yê 1’ê Teşrîne zî bi na qayde pîl bo.
Nesrîn NAVDAR