Bi rêkxistinên civakên sivîl  re gelek jin ên bajarê Dihokê tevli meşê bûn. Rêkxistinan bi navê Federasyona Civaka Sivil a Dihokê, Meclisa Yeketiya Jinên Kurdistanê, Yeketiya Ciwanên Kurdistanê û Navenda Çanda Dihokê tevli çalakiyê bûn. Piştî ku girse gihişt cihê çalakiyê  daxuyanî da çapemeniyê. Di daxuyaniyê de hat gotin ku gelê Dihokê ji ber vê êrîşa hovane ya li hember sê qehreman û lehengên jin ên Kurd pir xemgîne.

Jinan diyar kirin ku êrîşa li hemberî siyasetmedar û şoreşgerên Kurd êrîşek hovaneye û wiha hat bilêv kirin: “Ev êrîş ne tenê li hemberî van kesayetan hatiye pêkanîn. Di kesayeta van sê siyasetmedarên Kurd Sakîne Cansiz, Fîdan Dogan û Leyla Şaylemez de li hemberî têkoşîna gelê Kurd a ji bo azadî û aştiyê hatiye kirin. Lê bila dijminên Kurdan baş bizanibin ew ê bi van êrîşên hovane tucarî nikarin têkoşîn û xebata gelê Kurd a ji bo azadiyê têk bibe.”
Her wiha di dawiya daxuyaniyê de ji dewleta Fransa û hêzên ku dibêjin em mafên mirovan diparêzin hat xwestin ku demek ji ya din zûter kujerên komkujiya sê siyasetmedarên Kurd ên jin aşkere bikin. Di destpêka meşê heta dawiya meşê sloganên ‘Şehîd Namirin’, ‘Bijî Yeketiya Gelê Kurd’ hatin berz kirin.

DIHOK