AHMET KANBAL / MA / MÊRDÎN
Qezaya Nisêbînî ra girêdaye herêma Omeryanî de dewij û koçerî wexto ke varanî ver xo eştî mîyanê şikeftêk, ewja de raştê kateyanê merdimêkî ameyî. Ame dîyayene ke fekê şikefte bi kerrayan ameyo padayene û mîyanê şikefte de kateyê merdimêkî estbî. Dewijan seba ke kateyan bigîro, muracatê Komeleya ÎHDyî kerd û derheqê hedîseyî de muracatê gerreyê sucî kerd.
Nê kateyî înfazanê serranê 90î ano vîrê merdimî. Beno ke nê kateyî aydê kesê ke serranê 90î de Nisêbîn û Mîdyad de ameyî qetilkerdene bibî. Verê cû nizdîyê 300 kesan seba ke biresê kateyanê merdimanê xo, muracatê Dezgehê Tibê Edlî kerdbî.
Herêma Omeryanî eynî wextî herêma ke mezelê Armenî û Suryanîyan tede esto yo. Hetta verê cû mezelê komkî zî herême de amebî dîyayene. Labelê wexto ke seba cigêrayîşî Serekê Dezgehê Tarîxê Tirkan Yusûf Halaçoglu û Tarîxnaso swêdij Davîd Gaûnt şîbî herême, kateyî amebî vînîkerdene.