AMED DÎCLE / ANF / BRUKSEL
Asos herêma ke teberê Warê Pawitişê Medya de ya. Reya sifteyîne ya ke vera aye herême de hêriş virazîya. Çimeyê herême dîyar kenî ke hêriş ra ver ewja de teyarayê keşfî yê Îranî gêrayî. Yanî wina aseno ke Îran keşf kerdo û Tirkîya zî hêriş kerdo.
Hêzê kurdî zî vera nê hêrişî de bêveng î. Asos kontrolê YNKyî de o û YNK heta nika ti reaskîyon nîşan nêdayo. Gelo no hêriş pêkerdişê Tirkîya û Îranî nîşanê ma dano?
Seke yeno zanayîş 2011 de wexto ke pêvînayîşê Oslo ameyênê kerdiş, Musteşarê MÎTî Hakan Fîdan û hetkara ci Afet Guneşe roja ke şîybî Oslo, eynî roje şîybî Tahran zî. Amancê heyetê dewleta tirkî vera PKKyî de amadekarîya operasyonêkî bî. Îranî tirkan rê pêşnîyazê ‘PKK seba ma her dîyan zî tehluke yo, tena ma reyde nêqedîyeno. Şima Anqara ra hetkarîye biwazê, ma zî Barzanî û Talabanîyî reyde qisey bikerî’ kerdbî.
Anqaraye pêşnîyaz qebul kerdbî. Ma nêzanî NATO reyde çi ame qiseykerdiş. Labelê dima ra Tahran de kombîyayîşêk yeno organîzekerdiş. No kombîyayîş de Heyetê MÎTî, selahîyetdarê Îranî, Talabanî û Neçîrvan Barzanî zî ca gênî. No kombîyayîş de metnêko ortax yeno amadekerdiş û yeno îmzekerdiş.
Bi seyan merdimî tewqîf kerdî
Temmuza 2011î de operasyon hetê Îranî ra dîya destpêkerdiş. Dima ra dewleta tirk zî hewa ra hêriş kerde û destek daye dewleta Îran. Xora yeno zanayîş bi hedîseyê Farqînî pêvînayîşê Oslo qedîya. Dewleta Îranî nêşêna vera gerîla de serbikewo, cok ra adirbest waşte. Heta nika adirbest xira nêbî. Labelê demanê peyênan de Îranî bi seyan merdiman bi îdîaya ‘PAJKî reyde têkilîya ci esta’ tewqîf kerdî û koyan de faelîyatanê keşfî keno.
Hêrişo peyên ke Asos de bî zî nawneno ke mabênê Îranî û Tirkîya de derheqê PKKyî de peymanêka neweyî esta. Labelê peymanêka winasî rew bi rewe nêresena hedefê xo. Çimkî vera Qendîlî de operasyon bibo, do ser Iraq, Başûrê Kurdistan, Sûrîye ser de tesîr bikero. Do netîceyê ci giran bibî.