Serra 2015 de prosesê şerêko giran dest pêkerd û artêşa tirk bi hawayêko hîra ser gerîla de şî. Gerîlayê Azadîya Kurdistanî vera artêşa tirkî de têkoşînêko gird meşna. Netîceyê şero giran de gerîlayanê YJA Starî ra Yerîvan Kiçî (Şohret Şane) û Sarya Jiyane (Evîn Egîrcîke) 12ê nîsana 2016 de resayî şehadet. 

Cinîyan ra yewe Serhat ra ya, ya bîne zî Botan ra ya û rayîrê înan koyanê Kurdistanî de resayî pê. Sarya de ruhê serewedaritox yê Agirî, Yerîvane de zî ruhê xoverdakarox yê Şirnexî estbî. Resayîşê înan yê yewbînan bi toximê azadîye ke Kurdistan de ameybî reşanayîş ver bî.

Mîrasê Berîvane girewte

Yerîvan Kiçî (Şohret Şene) qezaya Hezexî ya Şirnexî de yena dinya. Keyeyê aye welatperwer o. Yerîvane serranê 90î de dej û êşê ke şarê kurd dewleta tirk ra antî pîlanê xo ra goşdarî kena. Wehşetê ke Yerîvane derheqê Cizîr û dewleta tirk de goşdarî kena, Yerîvane de hêrs û reaksîyonêko gird virazîyeno. Heto bîn ra hîkayeya serewedaritişî ya Berîvane goşdarî kena. Nê hîkayeyî Yerîvane de kerbêko gird awan keno. Gerîla Yerîvane her ke vera zulmî de hîkayeyê xoverdayîşan goşdarî kena, waştişê aye yê azadî hîna zêde beno. Emrê xo yo şenik de tarîx û têkoşînê azadîya kurdan ser o cigêrayîş kena û dima ra qerar dana ke beşdarê têkoşînî biba. Serra 2013 de beşdarê gerîla bena û bena omidê şarê xo.

Ma tim finak girewt

Derheqê cuya Yerîvane de embaza aye ya gerîla Amara Rosa Botane qisey kena û wina vana: “Her çiqas ke embaza Yerîvane zaf ciwan bîye zî, cuya PKKyî baş fam kerdbî û ruhê xo de baş daybî roniştiş. Hetê nîzam û dîsîplînî de tim çiman ver de bî. Seba ke têkoşînê xo berzêr bikero, tim mîyanê hewldayîşî de bîye. Seba ke hewl û keda aye zêde bîye, xebatanê pratîkan de tim serkewtênê. Ma zî aye tim bi nê husûsîyetanê aye yad kenî û xo rê finak gênî. Ma hem seba embaza Yerîvane û hem zî embazê ke şehîd kewtî rê sozê xo yê berzkerdişê têkoşînî dibare kenî.”

Ruhê serewedarkar bî sebeb

Sarya Jîyane (Evîn Egîrcîke) zî eslê xo qezaya Bazîdî ya Agirî ra ya û keyna keyeyêko welatperwer a. Serra 1992 de yena dinya û dima ra bi keyeyê xo koçê Stenbolî kena. Bajaro ke tede kapîtalîzm giranîya xo awan kerdo de Sarya bi kulturê xo bena pîl û serewedaritişê Agirî ke sey destan ziwanan de yeno vatiş, qet xo vîra nêkena. Tim çîyê ke şarê aye cuyayî yad kena û bi no hawa cuyena. Dima ra şona unîversîte û beşa muhasebe wanena. Labelê gêrayîşê Sarya benî sebeb ke cayê xo de nêvindero û aye zî 2014 de vera xo dana koyanê Kurdistanî.

Do têkoşînê ma serbikewo

Embaza aye ya gerîla Zelal Mardîne zî derheqê Sarya de qisey kerde û wina va: “Embaza Sarya vera şaşîyan de bi hawayo radîkal vindetêne. Tim hewl dayêne ke raştîyan bipawo û hetkarîye dayêne embazanê xo. Rîyê aye tim huyayêne û zerrîya aye pak bîye. Bi şexsîyetê xo merdimî ser de tesîr viraştêne. Zaf fedakar bîye û her hetê cuye de ca girewtêne. Ruhê fedayî yê PKKyî heta hesteyanê xo de daybî roniştiş. Sey gerîlayanê bînan, Sarya zî tim waştêne vera xo bido sehaya Vakurî ke gerîlatî de cayêko tewr zehmetin o. Ez aye ra zaf çî musaya. Ez seba ke layîqê embaza xo biba, têkoşîno ke teslîmê ma kerdî do serbikewo.”

Emanetê embazanê xo kerdî

Sarya û Yerîvane ke Botan û Serhat ra yî, badê ke beşdarê gerîla benî Warê Pawitişî yê Medya de yewbînan şinasnenî. Her çiqas ke demêko derg hetê yewbînan nêmanenî, reyna zî qaso ke hetê yewbînan de manenî, têkilîyêka xurte awan kenîy. Her di zî bi xususîyetanê xo yê taybetan benî sîmgeya embaztî ya PKKyî. Çîyo ke beno sebeb ke her di embazî zîrveyê embaztî de ca bigirî, hedefê înan yo ortax o û o zî ‘Rayberîya azade, Kurdistano azad û cinîya azade’ ya. Yerîvane û Sarya 12ê nîsana 2016 de têkoşînê xo sey mîrasêk embazanê xo rê verdayî û beşdarê karwanê heqîqetî bîyî.


ZENDA DÎROK /  ANF / BEHDINAN