Fermandarîya NPGyî derheqê serrgêra 34. ya Hemleya 15ê Tebaxe de mesajêk weşênaye. NPGyî mesajê xo de serrgêra 15ê Tebaxe pîroz kerd û wina vato: “Ma sey gerîlayê HPGyî bi bawerî, qerardarî û girêdayeyêka girde kewenî serra 35. ya Hemleya 15ê Tebaxe. Gerîlayê Kurdistanî do vera hêrişê sîstemê AKP û MHPyî de xover bidî û hêrişanê ci veng bivejî.”
15ê Tebaxa 1984î de vera dagîrkerîya dewleta tirkî de guleyo sifteyîn amebi teqnayene û aye roje ra nata Têkoşînê Azadîya Kurdî bêmabên dewam keno. Fermandarîya Qerargehê Merkezî yê Pawitişê Şarî (NPG) derheqê serrgêra 34. ya Hemleya 15ê Tebaxe de mesajêk weşênaye.
Fermandarîya NPGyî mesajê xo de dîyar kerdo ke ê serrgêra 34. ya Hemleya 15ê Tebaxe sere de Rayber Apo û heme hemrayanê înan yê warê têkoşînî de yî rê pîroz kenî û wina dewam kerdo: “Ma şexsê hemra Fermandar Egîdî de heme şehîdanê qehremanan bi rêzdarî vîr anî û ma sozê xo dibare kenî. Ma bawer kenî ke vîrardişê şehîdanê ma do têkoşînê azadîye berz bikerî û ma yewna rey soz danî ke ma do Kurdistan azade bikerî.”
Fermandarîye dewamê mesajê xo de wina vato: “Çalakîya 15ê Tebaxe ya girde newe ra ganîbîyayîşê merdimîya ke girîyaybî binê lingan, vera koletîye de guleyo sifteyîn û xeta newe ra estbîyayîşê şarê kurdî yo. Na hemle eynî wextî de dagîrkerîye ra hesabperskerdiş o. Na çalakîya azadîye kurdan reyna eşto dîkê tarîxî û tarîxê kurdan de sey Roşanê Ganîbîyayîşî cayê xo girewto.”
Ruhê yewîya neteweyî
Fermandarîye mesajê xo de qala têkilîya 15ê Tebaxe û yewîya neteweyî kerda û wina vato: “Çalakîya 15ê Tebaxe Kurdistan de vînayîşê yewîya neteweyî xelq kerdo û bîyo sebeb ke ruhê yewîya neteweyî ganî bibo. Reyna 15ê Tebaxe mezhepperestî, parçebîyayîşî, herêmcîtî û eşîrcîtîye wedarnayo û herinda înan de vindetişê demokratîke û neteweyî aver berdo. Eke herêma Rojhelatê Mîyanênî de kurdî sey îrade vejîyayî dîka tarîxî, tîya de rolê Ruhê 15ê Tebaxe esto. No saya xoverdayîşê şehîdanê ma de bîyo. Ruhê Egîd û Zîlanan ma ardo roja ma ya ewroyî û reyna no ruh do ma biresno serkewtişî.”
Sîstemê tecrîd û îşkenceyî
Fermandarîye mesajê xo de bale anto tecrîdo ke Rayberê Şarê Kurdî Abdullah Ocalanî de yeno domnayene ser û wina vato: “Qezençkerdişê nê hemînan de rolê Rayber Apoyî zaf o û cok ra Rayber Apoyî ser o tecrîdêko teylukeyin esto. Wa bêro zanayene ke Rayber Apo temînatê Tirkîya û aştîya welatî yo. Armancê nê zulm û îşkenceyî o yo ke zeyîfkerdişê hêzê têkoşînê ma yo. Labelê heta ke nê zulm û îşkenceyî bidomyî, têkoşînê ma û ruhê xoverdayîşî zî bidomyî.”
Ruhê Egîdî do rayberî bikero
Fermandarîye peynîya qiseykerdişê xo de wina vato: “Ma sey gerîlayê HPGyî bi bawerî, qerardarî û girêdayeyêka girde kewenî serra 35. ya Hemleya 15ê Tebaxe. Gerîlayê Kurdistanî do vera hêrişê sîstemê AKP û MHPyî de xover bidî û hêrişanê ci veng bivejî. Cok ra ruhê xoverdayîşî yê hemra Egîdî do nê prosesî rê rayberî bikero. Hêzê HPGyî do bi serkewtişêko gird pawitişê şarê Kurdistanî bikero. Xoverdayîşê ma bi şîyarê ‘Rayberîya Azade, Kurdistano azade’ bi Fermandar Egîdî dest pêkerd û bi Erdal, Adil Bilikî, Nuda Karkere, Reşît Serdar, Huseyîn Mahîr, Berçem, Cîlo, Delal Amede, Azade Sîser, Çîyager, Welat, Serdar û Baranan dewam keno. Ma do têkoşînê xo bi gerîlayanê profesyonelan biresnî merheleyêko newe. Ma Roşanê Ganîbîyayîşî pîroz kenî û heme embazan rê serkewtiş wazenî.”ç
ANF / BEHDÎNAN