Keyeyan rijnenê
Qezaya Colemerg Gever de mavêna quwetanê dewlet û YPS, YPS-JIN de pirodayişî ramenê. Vizêr hetê taxanê Cûmhûriyet, Gungor, Kişle ya verên, Mezarlik Orman û Dize de bombardûmanî viraziyay. Bi desan keyeyan xesar dî. Quwetanê YPS, YPS-JIN cewab da erîşanê dewlet.
Quwetê dewlet yê ke nêşayî dekewê taxan, bi kepçe û makîneyanê kar, taxa Cûmhûriyet û Eskî Kişla de destpa rişnayişê keyeyan kerdî. Banê ke nêşay birijnê zî teqînenê. Bi desan keyeyî û cayê karî welişnay, rijnay. Taxan de xoverdayişê qûwetanê YPS, YPS-JIN rameno. Heto bîn ra, serva şikitenê ablûqa Wan, Colemerg û Şemzînan ra bi seyan kesan vera Gever destpa rayşiyîn kerdî.
Welatijî raya Gever de yê
Heremê Bajirgeh ra bi seyan dewijî vera Gever kewtî ray. Qûwetanê dewlet bi wesayîtanê zirxî verniya welatijan girot. Welatijê ke herema Doskî ra kewtî ray raştê êrişê bi bombeyanê gaz amey. Şemzînan ra zî bi seyan welatijî bi wesayîtanê xo kewtî ray, la eskeranê qereqolê Şapatan verniya welatijan birna. Welatijan destpa nûmayişê ronişten kerdî. Colemerg ra zî welatijî seatanê sodir ra tepya hetê Gever kewtî ray.
Wan ra zî bi hezaran welatijî vera Gever kewtî ray. La quwetanê dewlet verniya welatijan girot. Welatijan barîqat û ablûqe ravêrnay û hetê Gever destpa rayşiyîn kerdî. Qezaya Wan Elbam ra zî bi seyan welatijî bi slogana ‘Bicuw xoverdayişê Gever’ hetê Gever kewtî ray.
DÎHA/COLEMERG