5 serrî verê seba ke Projeyê Qerargehê Leşkerî û Projeyê Cayê Peyayan yê Taksîmî bivirazyî, Parka Gezî de darî ameyênê birnayîş û vera birnayîşê daran de reaksîyonî virazîyaybî û dima ra nê reaksîyonî vilayê zaf cayanê Tirkîya bîbîy. Vera porejeya AKPyî de xeylê sazî û dezgehê sey DÎSK, KESK, Odeya Tabîpan ya Stenbolî, ODP, BDP, Platformê Taksîmî û sewbîna zaf komeleyî ameybî têhet û Piştîdayîşêyewbînanê Taksîmî awan kerdbîy.
Babete ser o Verfeka Piştîdayîşêyewbînanê Taksîmî Mucella Yapiciye qisey kerde.
Yapiciye va ‘şîddeto ke vera şarî de ameyêne meşnayîş, resaybî dûştêko winasî ke şar êdî eciz bîbî û vengê xo berz kerd’ û wina dewam kerde: “Her çiqas ke ma hende heqdar bîy, reyna zî ameyî ma ser de. Pawitişê warê rayapêroyî wezîfeyê dewlete bî, labelê şar bi xo nê wezîfeyî kerd. Seba ke wina kerdî netîceyê ci de xoverdayîşo ke heme dinya rê bî nimûne, vejîya orte.”
AKP hema zî israr keno
Yapiciye va ‘eke şima wazenî komelo ke bîat bikero awan bikerî, şima waranê xo yê sembolîkan xelq kenî’ û wina domnaye: “Raştîya xo de ma zaf ferq nêkenî, labelê mekan hema zî cayêko polîtîk o. Her zîhnîyeto ke beno îqtîdar, vatişê xo dano ferzkerdiş. Rasteyê Taksîmî cayê ke kêmhûmarê sey rûm, ermenî û sewbîna cuyenî yo. Serranê 1980 ra nata tim wazenî ewja de camîyêk awan bikerî. Ewja de viraştişê Qerargehê Leşkerî yeno manaya hesabê wextê awankerdişê komare. 4 serrî yo ke AKP wazeno xoverdayîşê Gezî ra ‘terorêk’ xelq bikero. Xoverdayîşê Gezî ra çîyêko winasî nêvejîyeno. Ewja de têkşîyayîşêk esto. Çimkî eke ti vera şarê xo de têkoşîn bidî, wina beno. Eke AKP înad bikero eşkeno bivirazo, labelê o nêbeno serkewtiş. Tesîrê Xoverdayîşê Gezî hema dewam keno.”
Se beno wa bibo ma do şêrî parke
Yapıcıye wina qedênaye: “Parke eynî wextî mîrasê Komare ya zî. Eke proje bierzîyo dewre, o wext nê xusûsîyetanê xo vînî kena. Ma bi desan reyan doze akerde û bi desan reyan qerarê ‘vindarnayîşê caardişî’ ame girewtiş. Ganî êdî no proje nêameyêne rojeve, labelê hema zî rojeve de yo. Ma do 31ê gulane de Taksîm de bibî. Çimkî hema zî raste azad nêbîyo. Na rey ma do tîşortanê xo xora bidî û şêrî parke.”
DÎHABER/STENBOL