Hemverfekê Înîsiyatîfa Piştîdayîşê Zindanan ê Stenbolî Arif Yilmazî da zonayen ke hewldayenê derbeya 15'ê Tîrmehe ra dima bi hezaran tepiştey sewqî girotxaneyanê bînî amey kerdiş û dîyar kerd ke bi seyan tepişteyê ke girotxaneyanê Marmara û Trakya ra sewqî girotxaneyanê Kepsut û Bûrhanîye yê Bandirma û Balikesîr amey kerden. Yilmazî ard ziwan ke herzewbîn giranîya tepiştey Kurdistan ra zî sirgûnê girotxaneyanê Behra Reş, Marmara û Trakya amey kerdiş û va, ‘nê sirgûnî pêrokîn açaryenê îşkence.
Arif Yilmazî dîyar kerd ke wextê sewqîkerdişî de xeylê reyî tepiştey bi îxlalkerdişê heqan ra rî bi rî manenê û wina va: “Bi wesayîtê rîngî raywanîyeke dûr û derg yena kerdiş. Tayî sirgûnkerdişan de tenya seba ke îşkence bikerê raywanîyeke derg kenê. Wexto ke Kurdistan ra tepişteyan benê girotxaneyanê Zerya Reş, raywanî 2-3 rojan rameno û no bi zanabîyayîş yeno dergkerden. Wextê sirgûnan de hewcedarîyê tepişteyan yê zey aw û werdiş nîyanê ca.”
‘Şiklê ciya yê îşkence estê’
Hemverfekê Înîsiyatîfa Piştîdayîşê Zindanan ê Stenbolî Arif Yilmazî diyar kerd ke wexto ke tepiştey sirgunê girotxaneyanê newî benê, bi cigeyrayîşê viran ra rî bi rî manenê û da zonayen ke wexto ke tepiştey nayî qebûl nêkenê zî yenê derbkerdiş û bi zorî cigeyrayîşê viran kenê.
Yilmazî dîyar kerd ke piranîyê tepişteyan bi tayî behaneyan qowîşan ra yenê vetiş û bê ke zanayîşê înan bibo neqlê girotxaneyanê bînî benê û nê detayan pare kerd: “Nêşkenê eşyayanê xo zî bigîrê. Eşyayê tepişteyan yan nînê rişnayîş, yan zî çend aşman ra dima resenê înan. Wexto ke eşyayanê tepişteyan rişnenê girotxaneyê newe, pereyê kargo zî înan ra birnenê. Ma nêşkenê sirgûnan tenya zey vûrnayîşê cayeke bîn pênase bikerê. Ma keyeyan ra bigîrê heta tepişteyan, her hetî ra mexdûriyet û îşkence esto.”
Keyeyî zî yenê cezakerdiş
Yilmazî ard ziwan ke girotxaneyê Tîpê T ê Wan, girotxaneyê Tîpê T ê Xarpêt û girotxaneyê Tîpê T ê Bandirma açarnîyayê girotxaneyê merkezî û wina va: “Nê cayan de zî ferzkerdişê 12'ê Îlone estê. hewldayenê derbeya 15'ê Tîrmehe ra dima xeylê tepişteyê camêr girotxaneyê F1 û F2 ê Sîncanî ra sewqê girotxaneyanê bînî kerdî. Bi nê sewqan wazenê rêxistinbîyayîşê tepişteyanê sîyasî vila bikerê.”
Yilmazî destnîşan kerd ke bi binlingkerdişê heqan ê tepişteyan ra pîya, malbatê înan zî yenê cezakerdiş û wina dewam kerd: “Tepiştey sewqê cayê ke malbatê înan nêşenê pêdîyayîş bi înan ra virazê yenê kerdiş û nayî ra tayî malbatî nêşenê serrekê yan zî di serran domananê xo bivînê. Malbatî her hetî ra yenê mexdûrkerdiş û bi no hawayî îşkenceyê malbatan kenê.”
STENBOL