Girotxaneyanê Tirkîye de her roj binlingkerdişê heqan benê hera. Îlankerdişê OHALî ra dima pêrokîn girotxaneyan de tepişteyê sîyasî bi îşkence, ceza, sirgûn, heqan ra bêparmendiş ra rî bi rî yê. Girotxaneyê Wan zî nê cayan ra yew o. Tepişteyan raya pêroyîn rê aşkere kerdî ke ê raştê binlingkerdişê heqan, îşkence û cezayanê kêfî yenê.
Tepişteyê ke Girotxaneyê Wan de manenê, bi raya telefonî malbatanê xo rê vatî ke, pêrokîn aktîvîteyê înan yenê manî kerdiş û nayî ra pîya îşkence û hêrîşê dûştê înan zî vejyayê merhaleyeke tewr corîn.
Tepişteyan ardî ziwan ke Rewşa Îstîsnayî ra dima zext û zorvajîyê vera tepişteyanê sîyasî vêşêr bîye û enê zonayîşan dayî: “Girotxane de Midûrê diyîn bi 16 gardîyanan eşto ser koxuşan, me derb kenê, firaxan kenê têtewr û dest nanê mektûb, defter, resim, kitaban û direnê.”
‘Cezayê disîplînî yê kêfî
Goreyê vatenanê tepişteyan, rayverîna girotxane cezayê disîplînî dano û bi nayî wazeno înfazê tepişteyan biveşno. Rewşa Îstîsnayî ra tepya heqê pêdîyayîşê akerdî ke aşmeke reye de yew seateke bi, kerdî di aşmeke reye û 45 deqeyan. Heqê telefonî ke hefteyekê yew reyî bi, kerdîye di hefte de reyî. Herzewbîn weşanê zey rojnameya Rojeva Medya, Ozgurlukçu Demokrasî ra pîya kovarî zî tepişteyan ra nînê dayen.
Tepişteyan herzewbîn da zonayen ke xêlê tepişteyê dawa Cemeatê Gulen’î ra dekerdê tepişteyanê dawa PKK û tepişteyê Cemeatê Gulen’î bi slogananê faşîst heqaretê tepişteyanê bînî kenê.
Goreyê vatenanê tepişteyan, pêrokîn heqê înan yê weşî yenê manîkerdiş û venga hestîyarî day raya pêroyîn.
No mabên de verîya 4 aşman de Wan de 3 girotxaneyê newî virazîyay û verîya ke înşeetê ci biqedîyo tepişteyê sîyasî sewqê ci kerdî.
OMER ÎKE / ANF / WAN