Rayberê Bajarê HDPî yê Amedî Karakaya vat ke nika merkeze Xarpêtî de hetkarîyê ke yenî vilakerdiş qiym nêkenê, no ser îzdîham vejîyeno. AKP zî goreyê sîyasetê xo hetkarî vila keno.

LÊL AMED / AMED

Tirkîya seba ke kuşaxê erdlerzî de ca gêno, no ser zaf hûmarî de fayê erdlerzî estê. Taybetî demê AKPî de sektorê înşaetî bê kontolî gird bî û no ser înşaetî ke ameyî viraştiş heme erdlerzî de zirardîyîşî rê hadre yê. No ser zî heme virazyayişê erdlerzan de zaf hûmarî de welatijê cuya xo dayê. Hetanê nika binê nameyê baca erdlerzî de bi milyar dolarî pere kom kerdê la belê erdlerzê Xarpêtî de nîşan da ke nê pereyê hewna îqtîdarî rê nêzdî hetkarê xo rê xerç kerdê. Demê erdlerzî Serekê Kizilayî heme welatijan ra pere waşt û waştişê pereyi rê zî medyaya komelî ser p zaf bertek ameyî nîşan dayiş.

   

HDP koordînasyonêk awan kerd

HDP zî seba hetkarîya welatijê ke erdlerzê Xarpêt û Meletî ra zirar dîyî rê koordînasyonêk awan kerd û no koordinasyon zî bi kamyonan hetkarî kom kerd û erşawit Xarpêt û Meletî rê. La belê polîsê AKPî destûr nêdayî ke welatijê nê zexîreyan rê feyde bivînê. Babete ser o rojnameyê ma rê Rayberê Bajarê HDPî yê Amedî Ramazan Karakayayo ke koordinasyon de ca gêno qise kerd.

Rayberê Bajarê HDPî yê Amedî Ramazan Karakaya vat ke senî ke erdlerz bîyo, ê zî Erxenî ra erdlerz hîs kerdê, roja bîn Erxenî de rêxistinê qeza û şaredarîya xo reyde ameyê têhet û heyetêk awan kerdê û peynî zî xeber daye Merkezê HDPî.

Rayberê Bajarê HDPî yê Amedî Karakaya wina vat: “Heyetêk awan bî, ma pîya sifte şî Gezîn, uca de ma cigêrayiş kerd û peynî zî ma şî HDPê Xarpetî. Ma uca de bi beşdarîya Merkezê HDPî, HDPê Xarpetî, rêxistinê qezayî, ESP ma kombîyayişêk viraşt. Ma programê xo viraşt, goreyê programî zî ma 3 polî ra cîya bî. Yew polê ma Gezînê Xûxî û dewanê ci gêrayê. Ma senî yew xebat bikê û xo biresê xo şarî rê ser o ma fikrîyayê. Peynî ma şîyê xebata xo viraşt. Ma nêzdî 40 heb dewî gêrayê. Dewan de çi lazimeyê dewijan estê ma tesbît kerd, zaf rayîrê dewî ameybî girewtiş û nê dewan de zî zaf banî ameybî rijyayiş. Dewijan taybetî nan, zexîre û çadirî waştî.”

Hetê dewlete çew nêraseyo welatijan

Karakaya dîyar kerd ê bi hetkarîya Şaredarîya Erxenîyî 2 kamyonî hetkarî kom kerdê û erşawitê la belê merkezê Xarpêtî de polîsan kamyonan vindernayî û tepa erşawitê, tay zî resayê dewan û wina domna: “Dewijan taybetî embazê ma rê zexîre û çadirî waştê, çimkî hetanê nika hetê dewlete çew dewijan nêgêrayo û wayîr nêvejîyayo. Wezîrê Karê Zereyî Soylu zî vato ke AFAD vêşîr çewî rê çik megê. Welatij nika mîyanê zor û zehmetî de nêcuyenê û dewlete rê çew nêresayo înan la nêverdonê ma zî biresî. Şar zexîre û çadir pawiyeno, dewijî tersî rê nêeşkenê keyeyanê xo rê nan bivejê. Dibistan û mîzgeftê zirarêko gird dîyî. Wa her kes seba hetkarîdayişê dest bierzo. Çimkî şarê ma mîyanê zehmetî de yo.”

Bertekê şarî AKPî ra esto

Karakaya bal ont bertekê şarî yê astengbîyayişê polîsê AKPî yê kamyonê HDPî rê û wina domna: “Ma demo ke dewan gêrayê, ma înan rê vat ke ma şima rê hetkarîyî erşawenê. Demo ke polîsan astengî vetê dewijan telefonê ma kerdê. Nika merkeze Xarpêtî de hetkarîyê ke yenî vilakerdiş qiym nêkenê, no ser îzdîham vejîyeno. AKP zî goreyê sîyasetê xo hetkarî vila keno, goreyê îxtîyacê şarî hetkarî vila nêbeno. Nika Xarpêt zaf bi serd o, şarê ma zehmetî anceno û no ser destek wazenê. Mesele Gezîn de dewijêk ame verê ma û vat ke banê ma rijyayo, ez teber de menda, ez seka? Şarê ma hetkarî wazeno.”