Konseptê tepiştiş û tewqîfkerdişî ver bi hezaran kesî nika hepis de yî û bi hezaran kesî zî yenî mehkemekerdiş. Nînan ra yewe zî Gulistan Dîken Akbaba ya.
Akbabaya ke wexto ke îdarekarîya BDPyî ya Rêxistina Qeza ya Maltepe kerdêne bin nameyê ‘KCK’yî de ameybî tewqîfkerdiş û netîceyê ci de 6 serrî û 3 aşmî ceza girewtbî. Wexto ke mehkeme dewam kerdêne Akbaba tehlîye bîbî, labelê cezaya Akbabaye hetê Yargitayî ra ameye tesdîqkerdiş. Akbaba lajê xo yê 7 aşmî reyde ameye tewqîfkerdiş û erşawîyayî Hepisxaneyê Bakirkoyî.
Babete ser o avûkata Akbabaye Hatîce Korkute qisey kerde.
‘Hakimo Feto'yî qerar da'
Korkute va ‘muwekîla mi xebatanê xo yê sîyasî ver yena mehkemekerdiş’ û wina domnaye: “Hakimo ke mehkeme îdare keno bi doza KCK, Şîke, Oda TV û sewbîna mehkemeyê şikinan yeno şinasnayîş. Na mehkeme bi qeraranê xo yê hetgiran ameybî rojeve. Serekê mehkeme Mehmet Ekîncî doza FETOyî ra ameybî tewqîfkerdiş. Heme embazê Gulistane cezayê înan ameyî taloqkerdiş, labelê Gulistane mecbûr a ke 2 serrî û 10 aşmî hepis de bimano. Gulistane qiseykerdişanê xo yê telefonî, mektubê ke hepisxaneyî ra ameyî û nuşteyê xo yê rojaneyî ver ceza girewto. ”
Avûkat Korkute peynîya qiseykerdişê xo de va ‘ganî bi hawayo lez no qerar bêro vindarnayîş û Gulistane û lajê xo serbest bêrî veradayîş.’
ANF / STENBOL