Gundem xoverdayişî ra tawîz nêdano
Vizêr zî Rojnameya Ozgur Gundem zey homara taybet yê Rojnameyê Atilim bi 8 rûpelan bi manşeta ‘Xoverdayiş rê dewam” vejîya. Seba rojname her ke şino sûkanê Kurdistan û Tirkîye ra poştdayen û wayîrvejyayen zî rameno..
Derp û îşkence kerdî
Heto bîn ra emegdarê Ozgur Gundemî ke ameybî binçimkerden û roja poncşeme serbest veradîyay ver çêberê rojname de amey pêhet, kombîyayişê xo viraştî û destpa kar kerdî. Rojnamegeran ardî ziwan ke ê cayo ke mendî ra dewam kenê. Edîtoranê rojname ra Sevdîye Ergurbuz da zonayen ke wextê binçimgirewten de raştê derp û îşkence ameyê. Ergurbuz aşkere kerd ke peycoy zî badê 7 seatan heta ke berdiyê nêweşxane raştê tacîz û şîdetî ameyê. Sevdîye Ergurbuz da zonayen ke quwetanê dewlet perbê psîkolojîk ê teybet ramitî. Ergurbuz vengê wayirvejyayişê rojname da.
Edîtora bîn yê Rojname Gunay Aksoy zî vist vîrî ke girotişê rojnameyî bi şiklekê bêhiqûqîn bîyo. Aksoy aşkere kerd ke înan no mîras Apê Mûsa û Gurbetellîyan ra dewr giroto û va, ma dê milê xo çewt nêkerê.
Tawîz nêdanime
Edîtorê bîn yê rojname Zekî Erdemî zî bi yeleganê çelîk û bi maskeyan sereştişê rojnameyî rê nêrazîbîyen damûsna û aşkere kerd ke o bi xo zî bi erdî ra keşkerdiş û bi şîdetî erzîya wesayîtî. Erdemî va ma dê xoverdayiş de dewam bikerê û raştîyan ra tawîz nêdê, Ozgur Gundem do weşana xo de dewam bikero. Mûxabîrê Ajansa Dîha Mesût Kaynar ke wextê sereştişî de ame binçimkerden zî aşkere kerd ke rîwalo ke Dîha sûcanê înan deşîfre kena bi hêrsî yê. Winî ayseno ke dê neyra tepya zî êrişê muxalefetî bikerê. Ganî ma gelenega çapemenîya azad dewam bikerê.
‘Qe peyser gam nêeşt’
Heto bîn ra seba Ozgur Gundemî her ke şino poştayenî benê jêde. Hemseroka Partiya Demokratîk ê Hereman Sebahat Tuncel ke temsîlxaneyê Ozgur Gundem ê Amed ziyaret kerd, poştdayenê xo ard zon.
Tuncel rojname rê herîş sey derbe hesibna û da zonayen ke no binlingkerdişê heqê xeber guretişî yê şarî yo. Sebahat Tuncel tarîx ra hetûn êr rixmê pêroyê herîşan tekoşîno erciyayê ê xebatkaranê Ozgur Gundem zî arde vîrî û vat: “No rojname pê bedalan girdan hetûn êr ama. Vilakerdoxî û xebatkarî qetil bî, banê ci bombavaran bi la Ozgur Gundem çiray zî pêd gûm nêeşt. Her herîşa dima binana quwetin tekoşînê xo rê dewam kerd.” Tuncel aşkere kerd ke Tirkiye pê nînan nêresena yew ca. Semedê holê pêroyin gerek rayverê hukumetê AKP nê poltîkayan caverdo, tecrîdê ser Birez Ocalan wedaro û yew kêbero newe akero.
NAVENDÊ XEBERAN
