Dewleta tirk heta nika neyare Kurd û Kurdistan’î ya. Tîya ra pê zî neyare Kurd û Kurdistan’î ya.
Wexto ke Komare Tirkîye roniya hina bî. Nika zî hina ya. Wexto ke Komare Tirkîye awan bî, CHP sermîyanê Tirkîye bî. O wextî ‘Plane Şerq Islahat’î (Şark Islahat Planı) viraşt, Şêx Seîd dima ra gore nê planî Kurdistanê de qirkerdiş kerd. Dew û bajarê veşnayî, xerab û vîran kerdî. Şarê Kurdî surgîn kerd. Sason, Motkan, Agirî û Dêrsim de eynî qirkerdiş raver berd. Cayo ke qirkerdiş kerd, uca de qerekol û qerargehê eskerî rona. Mektebê qirkerdişî awankerdî û nê mekteban de tutê (domanê) kurdî qir kerdî. Ziwanê Kurdî qedexe kerd. Va, “Tirkî qisey bikerenê la zaf qisey bikerenê.”
CHP, tirkî qiseykerdiş sey şaristanijî (modernî) nîşan da. Mistefa Kemal, Fewzî Çakmak û Îsmet Înonu serkêşîya nê qirkerdişî kerdênê. Vernîyê her kesî Îsmet Înonî û Fewzî Çakmakî planê qirderdîşî nuşt û plan kerd. Mustafa Kemal sey kalikê tirkî ameyêne namekerdiş. Fewzî Çakmak sey fetîhkarê Kurdistan’î ameyêne şinaşnayîş. Îsmet Înonî zî sey ‘Şefê Mîllî’ amebi namekerdiş. Yewe înan zî eslê xo de tirk nêbî. Her hîrêyê înan zî dewşîrme bî. Nê hîrê hemenan neyarî (dişmenî) ya şarê kurdî kerdêne.
1950’î ra dima hurendiya CHP, Partiya Demokrat (DP) girewt. Yanê kemalîst şîyê kemalîste kesk ameyê. Cayê fikrê tirkperêstîya laîk, tirkperêstîya îslamî girewt. CHP verê cû Kurdistan de çi kerdibi, eynî çîyê Demokrat Partî beyntare 1950 û 1960’î de dewam kerd.
Pey DP, Partiya Edalet (AP) bî sermîyanê dewleta tirk. Dima ra zî ANAP û DYP, peynî de AKP bîya sermîyan. Fikre DP, AP, ANAP, DYP û AKP înan pêro ser tirkpêrestîya îslamî yo. La raştî de eleqeyê nê partîyan û Dînê Îslam çino. Nê partî Dînê Îslam seba û qey şarê kurdî bikerê tirk, zê sîlah şuxulnenî. Mîyanê nî partîyan de tewr zafî zî AKP, Dînê Îslam hembere şarê Kurdî sey sîlah şuxulnena.
CHP, serranê 1920,1930 û 1940’an de se kerdêne, ewro eynî çîyan AKP kena. AKP hîna xirabî kena. CHP, bi nameyê Planê Şerq Islehatî Kurdistan de qirkerdiş viraşt. AKP, nika bi nameyê Planê Çokdayîşî (Çokturme) yew plan 2014’an de hadre kerd. Gore nê planê hêrîşê Kurdistan kena.
CHP dewê Kurdistan xirab û vîran kerdê. AKP, bajaran xirab û vîran kena. AKP, verê çimanê herkesî qirkerdişan kena. AKP, dest dawo ser erd, bajar û keyeyê kurdan. Tam karê dagîrkerî kena. Tam karê qirkerdişî kena. Kurdan keyeyê ci ra vejena, tirkê Ahiska û Erban ana Kurdistan de bi ca kena. AKP, tam neyare Kurdan a. Neyare tew wehş a. Verênan ma senî vato, AKP eynî hinaya. Verênanê ma vato, “Kutik kutik o ha sûr ha sîya.” Şarê Kurdî gera na raştî bivîno. Ha CHP ha AKP her di zî, neyarê şarê Kurdî yê. Gera şarê kurdî na raştî bivîno, gore nayî hembere AKP vindero. Nêverdo AKP, erd, bajar û keyeyê înan xirab bikero û dest bido ser. AKP, Kurdistan ra bivejo.