Emserre yew weçînayîşêk muhîm beno. No weçînayîş tarîxê Kurdîstanê de weçînayîş en muhîm o.
Dewleta Tirk û AKP seba no weçînayîş nîka ra destpêkerda, şerê taybet ramnenê.
R.T.Erdoxan vano, "Ma gera en tayê 400 parlamenter veji. Ma gera pergalê serokî bîyarê. Ma gera gore keyfe xo desturêk bingeyîn bivirazê. Ma gera gore hêşe xo ser Kurdan qerar bigerê. Ma gera qanûnêk asayîş bivirazê, kam hemberê na qanûnê bivejîyo, ma eyê sey terorîst vînenê. Çi hewce keno, ma kenê”
R.T.Erdoxan pê no weçînayîş wazeno ke bibo padîşah, bibo xelîfe.Eynî sey wextê Romê Bêbextî (Osmanîyan) xeyalê împaratorî keno.Eger AKP, no weçînayîş de serbikewro ê xeyalê Erdoxanî rast benê.
Gera şarê kurd hina bikero ke, xeyalê Erdoxanî çinbikero. Erdoxan seba Kurdan zaf xetero. Yew zalimo. Heta nika zaf fermanê qirkerdişê Kurdan dayo. 2006’de vat ke, "Çi cinî benê, çi tut(domam) benê pirodenê û bikişênê”. Komkiştişê Gelîyê Teyarê de eynî ferman da. Yê Roboskî de eynî ferman da.
Serhildanê Kobanê de eynî ferman da. Peyêne de seba Cizîre Botan ferman da. 4’ê înan tut bî, 7 Kurdîstanij hetê polîsê AKP ra ameyê kiştiş. Nîhat Kazanhan hîna 12 serrî bi.
Eger Erdoxan û AKP weçînayîşê 7’ê Hezîranê de serbikewrênê, çi zalimî dest înan de bêro ê bikerenê.
Şerê ke Rojavayê Kurdîstanê de bin name çeteyên DAÎŞ’de hemberê şarê kurd ramnenî, ê Bakure Kurdîstanê de zî biramê.
AKP gore nayê hadreyî kena. Şarê Kurd gera na raştî bizano, gore na raştî zî xebat bikero.
No derheqî de gureyê esasî kewno ser şarê kurd aye ke Ewropa de ciwîyenê. Ewropa de nêzdîyê di mîlyon Kurdê ciwîyenê. Zobî zî cayo ke Kurdî birêxistine xurtê Ewropa ya.
Şarê Kurd zaf weş û rind, bi berpirsyar xebat bikero, 400.000 zêdeyîr rayê HDP rê vejîyenê. Eger Ewropa de 400.000 rayê HDP bivejîye qet û qet problemê weçînayîş yê se ra 10 zî nêmaneno.
Şarê Kurd gore nayê xebat bikero, hûmarê parlamenterên HDP şeştayî derbas benî. Ucax Erdoxan neşkeno bibo padîşah û xelîfe. Neşkeno sere xo destura bingeyîn bivirazo. Neşkeno rehet rehet ser Kurd û Kurdîstan plane şer bivirazo û hêrîş bikero. Neşkeno Kurdan ra vajo "terorîst” û bikişo.
Seba nayê zî xebat hewce kena. Gera her Kurdê welatparêz en tayê 50 Kurdê bîn rêxistin bikero. Pêrone înan bibero cayê raydayîşê de bido nuştiş. Têna Kurdan ne, gera şarê bîn yên ke Kurdîstan, Anatolîa û Trakya ra bar kerdo û ameyê Ewropa, înan zî sey Kurdan rêxistin bikero. Wextê ray dayîş zî pêronê înan bêro ser sandiqê weçînayîş. Pêro pîya rayê bidenê HDP.
Her roj, her saet xebatêk hina bîyero ramitiş, serkewtina HDP bena serkewtina azadî.
Bena serkewtina Kurdîstanê. Bena serkewtina ma pêronan.
Hewê ewîlla ke wezîfe serkewtişêk zaf pîl, kewno ser kiftê şarê kurd yê ke Ewropa de ciwîyenê.
Seba nayê ma vanî.
Hadê Kurdê Ewropa! Xebat. Xebat. Xebat.
Hadê Kurdê Ewropa!
Serkewtiş. Serkewtiş.Serkewtiş.
Seba Kurdîstanê Azad rayanê xo bidenê HDP!
BIJÎ HDP!