Kalkan: Hîna dema komek bû, xwestin PKK´ê rawestînin û wê biperçiqînin. Ew tirsiyan nexasim jî ji ber ku yekî ji Derya Reş ev kar dikir. Rojnameger Îsmet Kayhan bi minasebeta salvegera şehadeta yek ji damezrînerên PKK´ê Hakî Karer bi Endamê Komîteya Rêveber a PKK´ê Duran Kalkan re peyivî. Duran Kalkan behsa rojên Enqerê yên Hakî Karer kir û got: “Hîna dema komek bû xwestin PKK´ê rawestînin û wê biperçiqînin. Ew tirsiyan nexasim jî ji ber ku yekî ji Derya Reş ev kar dikir.” Duran Kalkan îşaret bi civîna li devera Bendava Çubukê ya Enqerê kir û got:” Koma ku weke tevgera PKK´ê wê teşe bigirta, di rojeke Newrozê de tuxmê wê dihat avêtin. Rêber Apo Newroza 1973´yan li devera Bendava Çubukê ya Enqerê di civîneke bi pênc ciwanan re danî. Heval Hakî Karer di vê civînê de nebû; lê belê dema ku Rêberê Gelê Kurd Abdullah Ocalan ev civîn dikirin, li navbera semtên Enqerê Emek û Bahçelîevlerê, malekê bi Hakî Karer û Kemal Pîr re dima. Rêber Apo li Bendava Çubukê gava avakirina komeke Kurd diavêt, di heman demê de li mala lê dima komeke din a esasî hebû. Wan ev mal weke dibistanekê, navenda lêkolênan û rêxistinbûyînê dinirxand. Esasê komê fermî li Bendava Çubukê hat danîn û fermî ji wir xebitî. Lê belê koma li vê mala ez behsa wê dikim, sîsika komê bû û kom di pratîkê de bi rê ve dibir.” Hosteyekî rêxistinkirinê Duran Kalkan, Hakî Karer wekî “hosteyê rêxistinkirinê” bi nav kir û wiha behsa kesayeta wî ya şoreşger dike:” Kesayetiya Hakî Karer di hostetiya rêxistinkirinê de ya Kemal Pîr jî di çalakvaniyê de derket pêş. Bi vî awayî du alîkarên Rêber Apo ên bi rastî çêbûn ku pêkhatina rêxistinê ya teorîk-îdeolojîk di warê rêxistin û çalakiyê de temam dikirin. Li vir, Hakî Karer xwe da ber erkeke gelekî zehmet a lebikîna bi mirovan re, perwerde û rêxistinkirina wan û bike ku ji bo şoreşê karibin kar bikin; wî ev kar serketî jî meşand. Ji ber vê yekê Rêber Apo ji bo wî got, “Ruhê min ê nepenî“. Sala 76’an çû Kurdistanê Heval Hakî sala 1973, 74 û 75´an li Enqerê karê xwe kir. Tevahiya malên ku navenda koma Enqerê pêk dianîn, heval Hakî ew bi rêxistin kirin û bi rê ve birin. Havîna 1976´an bi temamî ji bo lê venegere ji Enqerê veqetiya. Lê ev ne cara yekê bû ku çû Kurdistanê. Payîz yan jî Zivistana 1975´an çûbû Batmanê jî ji bo xebatê. Ji ber pirsgirêka ziman nikarîbû gelekî bimîne. Heval Mazlûm çû Batmanê. Ji Hakî yê ji Derya Reş gelekî tirsiyan Wan ê ku heval Hakî qetil kir, xwe weke komeke Kurd dabûn nasîn. Ji wan re digotin “Pênc parçeyî”. Wan Kurdistana Sor a li Ermenistanê jî parçeyek hesab dikir. Li serê wan Alaattin Kapan hebû; ev kes teqez ajan-provokator bû. Yek ji wan kesan bû ku 1´ê Gulana 1977´an komkujiya Taksîmê kiribûn. Hîna dema komek bû xwestin PKK´ê rawestînin û weê biperçiqînin. Ew tirsiyan nexasim jî ji ber ku yekî ji Derya Reş ev kar dikir. Cenazeyê heval Hakî roja çaran ji nexweşxaneyê hat wergirtin. Tevahiya hevalên ku qewmîna bûyerê bihîstin, berê xwe dabûn Entabê. Bi şev û bi roj dora nexweşxaneyê tijî apocî bûn. Cenaze hat wergirtin û di ser Enqerê re ew bidin Ordu-Ulubeyê. Di merasîma cenaze de êdî sloganên PKK´ê bi xwe hebûn. Ev jî “Bimre mêhtingerî” û “Bijî serxwebûn” bûn.” Tolhildan Rêber Apo timî got, PKK “rêxistinbûna ji bo bibîranîna Hakî Karer e” û PKK weke partiya şehîdan ragihand. Bêyî ku ruhê û îradeya şoreşger a tolhildanê hebe, li Kurdistanê wê tevgera şoreşger bi pêş neketana. Ji bo dîtina kujerên heval Hakî lêgerîneke dirêj a bi sebir dest pê kir. Di dawiyê de kujer li Skenderûnê li cihê ku xwe lê veşartibûn hatin dîtin û cezakirin.”  NAVENDA NÛÇEYAN