Ciwanê kurd Halîm Denero ke 23 serrî sûka Almanya Hannover de wexto ke afîşê ERNKyî aliqnayêne, hetê polîsêkê almanî ra amebî qetilkerdiş, heta nika doza Danerî de netîce nêvejîya. Îdareyê Eyaletê Saksonyaya Cêrêna ke bi polîtîkayanê xo yê wişkan yena zanayîş, mîyanê 23 serran de seba ke nameyê Denerî bido vîrîkerdiş, çi destê ci ra ame kerd. Heta nika her çiqas ke hewl dîya ser nameyê Denerî de abîdeyêk bêro ronayîş, hetê nê îdareyî ra destûr nêame dayîş. Abîdeyê ke ameyî ronayîş zî hetê şaredarîye ra ameyêne wedarnayîş.
Meclîsê Şaredarîya Qeza qerar girewt ke nameyê Halîm Denerî bidîyo rasteyêk. Labelê sere de lobîya tirkan û ortaxê înan Partîya Demokrate ya Sosyal (SPD) û Yewîya Demokratê Xirîstîyanî (CDU) vernîya qerar de astengî vetbî. Hetta qezaya Lînden-Lîmmerî ke destê SPDyî de ya, nê qerarî red kerdbî. Meclîs vera qerarê redkerdişî de reyna qerarî girewt. Goreyê qerar rasteyo ke mabênê cadeyanê Velvet û Pfarrlandî rê do nameyê Denerî bêro dayîş. Tîya heta nika sey Rasteyê Velvetî ameyêne zanayîş.
Hetê polîsêk ra ame kiştiş
Heto bîn ra meclîs qerar girewt ke rasteyî de nuşteyêko winasî zî do bêro nuştiş: “Halîm Dener (27.12.1979 -01.07.1994). Bextwaştox û aktîvîstê kurdî demo ke afîş aliqnayêne hetê polîsêk ra ame kiştiş.” Meclîsî sebebê qerarî de va ‘bi Rasteyê Halîm Denerî qezaya ma yewna rey nîşan daye ke hetê renginîya kultur û etnîsîteyan de ca gêna.
PERWER YAŞ / ANF / BERLÎN