Kam, kam ra sene omid pîno? Mesela Tirkiye yê kurdî gune bêro halkerdene. Rew ya zî herey.
Hama serokwezîrê tirkî RTE ra omid giredayene, meselade giran a.
Siyasetvanî zovîna qalkenê, naye rê heqa xo zî esta.
Ez siyasetvan niyu, besenêken jê siyasetvanan qesey bikerî. Sevevê naye zî zaf yê. Çike ma qomê kurdî zaf terikî werdî. Werdo ke ma werd, fekê ma vêsna.
Jûyî ke mara ‘alaqutare’ vat, ma îman kerd, destê xo da ci.
Peyniye de muxatabanê ke destê ma guret, ma kaskerdîme tir û kasan rê eştîme. Coka gune dîqqet bikerîme.
Leyla Zana heşto peye roportajê xo yê ‘Hurriyet’ de xêle çî ardî ra zon. Lewê pêro kemiya hukumatî de, omidê xo RTE ra zî zaf zelal ard ra zon. Gegane xorê van, ez nêzonen peyê pêruge de se beno, siyasetvanî hebena rind zonenê, hukumat se fikrîno.
Ez mesela omid de se niyadan?
Jede peyser nêson, RTE nî rozanê peyenan de se vat û se bî, înan an vîra xo, omidê xo zî gorê nî vatîsan ayar ken.
RTE, kam fermanê Tertelê Roboskî do, hona eskera nêkerdo. Vano ‘ma tazmînat do, domonê ke Roboskî de kişiyê ça payna mayîn nê do. BDP kaleş a ....’ û her roz vano ‘teror’ zovîna tewa nêvano.
AKP serokê belediyanê BDP tever ra nêverdayî. Ez na omid famnêken.
AKP siyasetvanê BDP tever ra nêverdayî. Sene omid!
RTE bi xo vano ‘mesela ma yê kurdî çîna, mesela ma yê terorî esta.’ Kamij omid!
RTE wazeno Perdator bi çekan biherîno. Înan hora ewro verva kam ano kar zoneme. Sene omido zîndî!
Rozê yardimkarê serokwezîrê tirkî, Beşîr Atalay melayîm qesey kerd, roza bîne pêro serokê belediya yê hetê Wan ceriyayî zerre. Çi omid, çi omid!
2009 dima se bî, naye zî ma pêro zoneme.
Mi ke nî vatîşî ardî pêser û wast bi omid bî, besenêken.
RTE ra qe omidê mi çîno. Hata nika siyasetvananê marê tîvariya mi biye.
Eke RTE rast omidê înan nêsikit, mesela Tirkiye yê en girse bi haştiye û rumet halkerde, o waxt ez zî lew nan ey û siyasetvananê ma dest ra
Eke na raye vatena siyasetvananê ma rast nêvejiye, o waxt endî înan rê zî omidê mi nêmaneno.