Vizêr rîwalê serragêrê Komployê 15ê Sibat yê Mavêndewletî Kurdistan de cuwyan vindiya. Herzewbîn çehar leteyê dinya de zî nûmayişê protestoyî viraziyay. Nûmayişan de waştena Azadiya Ocalan’î berz bî.
Amed: Amed de, vizêr seatanê sodir ra tepya esnafan kepengî nêakerdî û wendekaran mektebî boykot kerdî. Bi seyan welatijî ser vengdayişê DBP, HDP, KJA û DEM-GENÇ’î Meydanê Batikend yê Baglar de are bî. Nûmayişkaran bi slogan û dowîzan vera komplo nêrazîbiyenê xo damusnay. Badê qiseyan welatijan bi sloganê “Bicuw Serok Apo”, “Nezdîbiyayişê Rayverîn sebebê herb o”, destpa şiyayiş kerdî. Polîsê ke ver protestoyî xo nêgirotî bi bombeyanê gaz êrişê welatijan kerd. Sûk de pirodayişî heta seatanê berey dewam kerdî.
Vakûr de bêvengiya roja tarî
Şirnex: Şirnex û qezayanê ci de zî serragêra komplo de vizêr cuwyan vindiya. Nûmayişê protestoyî yê ke taxanê Yenîmahalle, Dîcle û Bahçelîevler de şewa verî ra destpa kerdî heta vizêr şan dewam kerdî. Vizêr zî sûk de kepengî nêabiyay û welatijî ver banê HDP û DBP de are bî û komplo rê nêrazîbiyen damusnay. Qezayanê Şirnex Sîlopî, Hezex, Elkê, Qileban û Basan de zî komplo lanet bi.
Merdîn: Jew cayo bîn ke Komployê Mavênnetewî protesto bi Mêrdin o. Navendê Sûk û qezayanê ci Qoser, Nisêbîn, Kerboran, Dêrik, Şemrex, Mîdyad, Mehsêrt, Stewrê û Yeşîllî de kepengî girotey mendî û wendekarî nêşî mekteb. Komplo bi aşkerekerdişê çapemenî û şiyayişan protesto bi. Nisêbîn ke kebengî nêabiyay de, domano 12 serre Mûgdat Ay ke şewa verî hetê quwetanê dewlet ame qetilkerdin bi merasîm û slogana ‘Şehît nêmirenê’ defin bi. Badê merasîmê definkerdiş welatijan bi şiyayiş Komployê 15ê Sibat protesto kerd.
Colemerg: Rîwalê Komployê Mavêndewletî Colemerg de bi rojano kepengî nêabiyay û mektebî boykot bî. Vizêr zî sûk û qezayanê ci de cuwyayiş vindiya û komplo protesto bi.
Riha: Qezaya Riha Pirsûs de bi seyan kesê ke ver bana DBP de are bî damustayin day çapemenî. Nûmayiş de panqarta “Bi rihê xorayverînan Komployê 15ê Sibat protesto keme” abiya. Qiseyan de vajiya ke komplo do ti wext nîro vîrkerdiş û serva serbestiya Ocalan’î sozê berzkerdişê tekoşîn ame dayen.
Şar Rayverê xo het de yo
Van: Vera Komployê Mavêndewletî jew nûmayişê protestoyî zî Wan de viraziya. Des hezaran kesê ke vejyay meydanan komplo lanet kerdî. Welatijî bi slogananê ‘Bicuw Serok Apo’, ‘Bicuw xoverdayişê Cizîr’ destpa rayşiyîn kerdî. Temsîlkarê TUYAD-DER yê Wan Emîn Şeker’î damustayin da û vist vîrî ke Rayverê Şarê Kurd Abdullah Ocalan bi raybazê qorsanî ardî Tirkiye.
Şeker’î hayr antî tecrîdê Ocalan’î ser û aşkere kerd ke AKP rîwalê ke hewldayenê haştî yê Ocalan’î ra tersena, cok ra pêdiyayişan manî kena. Şekerî vist vîrî ke, serva ke Ocalan’î polîtîkayanê şantajî qebûl nêkerd raştê tecrîd ameyo. Emîn Şeker’î da zonayen ke, şaro ke Cizîr, Gever, Sûr û Sîlopî de xover dano Rayverê xo het de yo. Şeker’î aşkere kerd ke Ocalan tenya yê Kurdan nê, omidê haştî û azadî yê pêrokîn şaranê Rojhelatê Miyanî yo û wina va: Vera zalim û dîktatoran Ocalan qeleyê peynî yo. Herkes nayî rind zano ke, Ocalan mîmarê haştî, Erdogan zî mîmarê herbî yo.
Elezîz: Bi desan kesê ke Garajê Hozat de are bî damustayin day çapemenî. Hemserokê DBP yê Sûk Mehmet Kiliçtepe’yî qisey kerd û Komployê 15ê Sibat lanet kerd. Kiliçtepe’yî vist vîrî ke AKP wazena polîtîkayanê qirkerdin rojane bikero.
Pêroyîyê Serhed de nûmayişî
Îdir: Bi seyan kesê ke ver bana DBP yê sûk de are bî, bi damustayinê çapemenî komplo lanet kerdî. Nûmayişa ke slogana ‘Bicuw Serok Apo’ berz bî de hemserokê DBP Oguz Ok’î qisey kerd û vist vîrî ke şexs dê Ocalan’î de pêrokîn şarê Kurd hedef kerdî. Ok’î waştena serbest viradayinê Ocalan’î ard ziwan.
Agirî: Sûk û qezayanê ci de komplo bi şiyayiş û aşkerekerdişan protesto bi. Şiyayişa ke navendê Agirî de viraziya bi seyan welatijî tewr bî. Protesto de hayr ant tecrîdê vera Ocalan’î ser û vajiya ke Ocalan’î bi xoverdayişî komplo veng vet.
Qers: Rêxistinê DBP û HDP ke serva protestokerdişê komplo are. Bado ke şiyayişê protestoyî ame manîkerdiş, aşkerekerdişê çapemenî ame dayen. Welatijê ke çina (kinc)yê siya xo kerdî, fekê xo bi bandê siya girotî û komplo protesto kerdî. Nûmayiş de sereştişê dewlet rê nêrazîbiyen damusniyay û vajiya ke bi serbestiya Ocalan’î haştî do bîro. Qezayanê Qers de zî komplo bi protestoyanê ciya protesto bi.
Riha ra heta Şengal protestoyî
Bêdlîs, Sêrt, Mûş, Semsûr, Dîlok û Riha de zî welatijî nêşî kar, kepengî nêakerdî û bi bêvengî komplo lanetkerdî. Metropolanê Tirkiye yê zey Edena, Mersîn, Stenbol, Kocaelî, Yalova ûsb. de zî welatijan bi nûmayişanê ciya Komployê 15ê Sibat yê vera Rayverê Şarê Kurd Abdullah Ocalan’î protesto kerdî.
Komployê Mavêndewletî tenya Vakûrê Kurdistan de nê, Rojawa, Şengal, Başûrê Kurdistan ra piya, çar leteyê dinya de zî bi nûmayişan protesto bi.
NAVENDÊ XEBERAN
Waştî Kurdan werte ra wedarnê
15’ê Sibate 1999 de Rayverê Şarê Kurdî Abdullah Ocalan bi komployêke mîyanneteweyî ke engişta seyan dewletan tede esta ame tepiştiş û teslîmê dewleta tirk ame kerdiş.
Bi na komplo hêzê ke komploye de engişta înan estbî hedef kerdî ke do Tirkîya de kaosêkî gird bivejî û Tevgera Azadîya Kurdan zî werte ra wedarnî. La her çend ke 18 serrî komplo ser o vîyart zî nê dewletî nêresayî hedefê xo. Azayê Rayverîna Partîya Yewîya Demokratîk (PYD) Hesen Koçer’î derheqê komplo û rolê kurdan ê Rojhelatê Mîyanî de qalî kerd.
Koçer ciresna ke kurd êdî kurdê verên nîyî û wina verdewam kerd: “Kurd hem Rojawan û hem zî Vakur de averşîyayîşê dîrokî cuyenî. Rayverê Şarê Kurdî Abdullah Ocalan komployêke waşt kurd û tevgera kurdan werte ra wedarno bi felsefe û stratejîyêke newe şikna. Yê ke komplo viraştî nêşînay gamêke tepa kurdan ra bidî eştiş. Pûçkerdişê na komploye de rolê Rayberî gird o.” Koçer bal ant hovîyeya dewleta tirk a ke Vakurê Kurdistanî de virazena û wina domna: “Hêzê mîyanneteweyî û çapemenîya mavênneteweyî wexto ke kesêkî Sûrîye de yeno kiştiş dinya xira kenî, labelê wexto ke babet bena Vakurê Kurdistanî veng înan ra nêvejyeno.
Dûstê ma de siyaset kenê
Semedê ke menfîatê înan çin o, bêveng î. Ma eyro baş fam kenî ke yê ke dûstê ma sîyaset kenî, samîmî nîyî. Ma wazenî estbîyîşê şarê kurdî îspat bikerî û seba ci zî ma her kesî reyde têkîlî ronenî.”
Koçer verdewamîya qalîkerdişê xo de vat ke PDK dûstê qetlîamê Vakurî bêveng a û wina peynî kerd: “PDK zî wayîrê zîhnîyetê AKP ye. PDK herinda yewitiya kurd warzêna malbat û partîya xo esas gêna. Karo ke PDK kena helwestêkî dişmenî yo. Dewleta AKP/Erdogan awayo aşkere vanî ‘Destûrdayîşê awanbîyîşê rayberîyekê Vaşûrî reyde ma şaşîyêke gird kerd la ma do nêverdî ke Sûrîye de rewşêke inasar bêro cuyayîş’. Manaya no vatişî çîyo? Yanî vanî wexto ke ma Rojawanî tesfîye kerd, dor yena Vaşûrî zî, la PDK bi israr nêwazena fam bikera. Heremî de bêxera ma plan û projeya ti kesî çin o.”
MAHÎR YILMAZKAYA / ANF