1ê Êlule Roja Haştî yê Dinya de xêlê sûkanê Kurdistan û Tirkîye de welatijî vejyay meydanan û waştena haştî kerdî. Dersim ra heta Semsûr, Wan ra heta Erzirom, Sêrt, Agirî, Qers, Riha, Mereş, Stenbol ra heta Hatay, Edena, Mersîn û Îzmîr nûmayişê cîya cîyayî virazîyay. Dîlok de zî cayo ke qetlîam virazîya de qerenfîlî ronîyay.
Nûmayişa Roja Haştî yê Dersim Kuçeyê Sanat de destpa kerd. Heskerdoxê haştî bi panqarta “Dûştê faşîzmî, derbe, OHAL û herbî demokrasî û haştî wazenime” heta Meydanê Sey Riza rayşî.
Parlamenterê HDP yê Dersim Alîcan Onlu, hemşaredarê qezayan, îdarekar û temsîlkarê DBP, HDP, DHF, ESP, EMEP, PARTÎZAN, KESK, DAD, CHP ra pîya xêlê temsîlkarê Sazgehê Civaka Sivîl kî tewrê nûmayiş bî. Badê vinderdişê hurmetî damûstayina ‘Seba Emeg û Demokrasî Jûbînaquwetî’ ame wenden. Serokê Şûbeyê Komeleya Heqê Mordeman yê Dersim Gurbuz Solmazî da zonayen ke rîwalê herbî 77 serrîyo hona kî Roşa Haştî yê Dinya besenîkenê bimbarek bikerî.
Waştennameyê quwetanê emeg û demokrasî
Solmazî aşkere kerd ke verra nî polîtîkayanê herbî ganî her roj açarnîyo 1ê Êlule û zey quwetanê emeg û demokrasî nî waştenan ard ser zon:
* Waşten kenime ke, Tirkîye peynîya mudaxaleyê lejkerî yê Sûrîye bîyaro û tayînkerdişê qederê xo bi xo yê şaranê Sûrîye ra hurmet bicîro,
* Herem de peynîya operasyonanê lejkerî bîyaro, serva çarekerdişê meseleya kurd gamanê hewce bierzo û tecrîdî wedarno,
* OHAL bîro wedarnayen, pêrokîn manîkerdişê verra heqanê demokratîk û azadîyan bîrê wedarnayen,
* Peynîyê çarçoveyê esasanê dînî de hewldayenê înşakerdişê civakî bîro dayen, azadîya îtiqatan rê hurmet bîro giroten, pêrokîn manîkerdişê ke vernîya welatekê laîk, demokratîk û azad ra pîya manîkerdişê vernîya azadîya çapemenî bîrê wedarnayen.
Kilîtê haştî Îmrali yo
Solmazî ra dima Parlementerê HDP yê sûk Alîcan Onlu qisey kerd û hayr ant tekoşîna serbestî, haştî û demokrasî ser. Onlu va, na dewleta faşîst, nîjadperwer, înkarker ke mixê ci ca ra vejyayo lazimo ma reyna mixê ci bi ca bikerê. Alîcan Onlu da zonayen ke verra zihnîyeta nîjadperwer ya jûjûyî Blokê Emeg û Demokrasî ronîya û nîya dewam kerd: “Na blok do bingeyê derbe wişk bikero, seba demokratîkbîyena Tirkîye, bi haştîyane çarekerdişê meseleya kurd û pêrokîn meseleyan do tekoşîn bikero. Herema ma de, Tirkîye de kilîtê haştî, demokrasî û pîyaciwîyayişê Îmrali yo, Rayver Apo yo, Birêz Ocalan o.”
Onlu vist vîrî ke reyna sifte AKP ra wazenê ke derheqê rewşê Ocalanî de zonayişan bido û va, neyra tepya pêrokîn hewldayenê ma dê seba demokrasî, serbestî, haştî û açarnayişê muzakereyan bê. Seba nayî wazenime ke na gama sifteyîn heta 5ê Êlule bîro eştiş.
Semsûr de kî bi rayverîna MAZLÛMDER û KHM de Parka Demokrasî de damûstayîn amê dayen. Aktivîstanê Heqê Merdiman bi tirkî û kurdî panqarta “Bicuwe haştî" hewaday. Îdarekarê KHM Bulenç Çinar ke damûstayîn da hayr ant herb û mudaxaleyê Cerablûs ser û waşt ke desinde polîtîkayanê herbî ra fek bîro veradayen.
Dîlok de vîrarden
Dîlok de 1ê Êlule, Roja Haştî yê Dinya de azayê Blokê Emeg û Demokrasî yê sûk heta taxa Beybahçe ke qetlîam virazîya rayşî. Nûmayişkaran panqarta “Qetlîama Beybahçe lanet kenime” akerdî û slogananê zey “Şehît nêmirenê”, “Kiştox DAIŞ pîyakar AKP”, “Qasîdê haştî Îmrali de yo” berz kerdî. Temsîlkarê HDP, DBP, KJA, EMEP, ESP, SYKP, YSGP, ’78'liler Dernegî’ bado ke resyay cayê qetlîam jew deqe vinderdişê hurmetê girotî.
Parlementerê HDP yê sûk Mahmût Togrûl ke vîrardişî de qisey kerd da zonayen înan verpersîyaranê qetlîam verî ra zana bi û çend reynî ardîyaybî ziwan. Togrûl vist vîrî ke la rixmê nê îqazan teba nêame kerden û qetlîam bin qontrolê dewlet de virazîya. Badê damûstayîn nameyê kesê ke qetlîam de weşîya xo kerdî vinî wanîyay û qerenfîlî ronîyay.
Bi wesîleyê 1ê Êlule Roja Haştî yê Dinya sûkanê Riha, Sêrt, Mereş, Îzmîr, Agirî, Qers, Erzêrom, Wan, Mersîn, Edena, Hatay û Stenbol de zî nûmayişê cîya cîyayî virazîyay. Nûmayişan de waştena haştî amê ziwan û AKP ra wazîya ke peynîya polîtîkayanê herbî bîyaro.
NAVENDÊ XEBERAN