Her merdim wazeno bi mîrasî xo teqdîr bo. La heyf ke ez ha sekerat de ya. Deshelato dagirker Heskef ra hetana Qesra Îsak Paşa, Nemrût ra hetane Cudî, Torosan ra hetanê Zagrosan bi hezaran, çi mîrasî şaro kurd û merdimahî estbi, retibnayo înkar keno.
Hele seserra vîst û yewînê bi hezaran tarîxî abîde kurd talan bi, raşîya. Kamîya ma, vîr û vîna ma tarumar bî. Ewro, mîraso ku ma lezgîn wayerbi, ziwanê ma yo. Ewro hedî-hedî qir beno. Çimkî weşerê kird, qisekerdişîya kirdkî qut kerdo. Her kurd gedan xo derê tirkî qise keno. Hef ke tirkî bîya ziwanê zanîstî, bîya ziwanê nan û ziwanê hemê munasebetan û ragîhandî. Malesef ewro kirdkî her hetê de tesîrî xo vînî kerdo.Maya kurd, êdî gedan xo derê kurdî qisey nêkena.Yew aneknot tarîx 15 Gulanê 1932, mîrî ziwanê ma Celadet Bedîrxan ‘Kowara Hawarî’ pelo verînî de nuseno ke; ( …Kovara Hawar sey tuteka newe ya, qicî ma ya, qicî kurdan a. Qic senî bê dadî û babî xo nîcuyeno, qic senî ke bira û dezay xo derê beno pîl…
Wa kes mevajo, ez merdime ka rebena, kerî nê kare ziwanî nêna. Mi rê çîyêk nêvejîno, wa mevajo. Her kes şikenê, bi qeydeyêk vajo hawar! Hawarê kurdî…). Heger ewro her kurd têfek ra, têder nêvajo, ey! hawar! zonê ma qedîya, vînî bi. Heger her kurd nêvajo ‘berên ma her qade komelî de bi riheko seferberî, ma zonê xo qise bikêre, biwanê û binuse’ ziwanê ma o qedîm ma ra ho xatir biwazo. Malesef no mîraso xozayî û no mîraso kulturî, heger ma bi riheko seferberî, bi xover dayeno bê hempa miqate nêbibî se vînî beno. A ke tam halîn a, mîhrag a, heger kurdî vînî bo, se beno? Qiyamete ma rabena. Kurd beno ereb, tirk û fars.
Roja mahşerî de nî Kurdistan ma, nî zî ecdadî ma ma qebul keno. Malesef 15 Gulan roja roşanê kurdî ma rê bîya roja hawara kurdî. Kurdî vana, hîna zaf herey nîyo, êdî pe mi bi fikir, pe mi sîyaset biker. Mi bikere eşqî xo, ez reyna-reyna bibî maya kurd, bibî asmanî Kurdistan. Kurdî vana, kurdno mi sey yew nefes bianc xo zere. Mi reng-reng perade. Mi bikere melodî, mi biker deyîranê şehîdan. Mi bikere Mûnzûr û Mirad. Mi bikere name, xora di. Ez zana, ez seranserî Kurdistan de namê tutanî mi Rodî yo, Zana yo. Berçem a, Zelal a. Heyf ke nêy zonê xo nêzanê. Tutî ma, tirkî wanenê, tirkî temaşê kenî û goşdarenê. Keye de her çî tirkî yo.
Ez vana kurdno, êdî xo otoasîmîlasyon mekerêy. Ez vana kurdno, tena kurdî çareya. Kurdî encam a. Her ziwan heman wext xercî yewîtîyo, milet keno milet, şarî yew îdealî de pêresneno. O ke, îstîqamet dano xoserî û o ke verê xo dano aqubetîya azad zî ziwan o, kurdî ya. Ez vana kurdno nê esasan ser, ez newe yew seferberî wazena, wa her kurd êdî kurdî biwano, binuso û qisey bikêro.Roçanî ziwanê ma pîroz bo.