Partîya Demokratîke ya Şaran (HDP) weçînitişanê 31ê Adare de Stenbol de namzedî nêramotî û kerd ke tîfaqê AKP-MHPyî bin bikewo. Hemvervatoxê Kongreya Demokratîke Şaran (HDK) ê herêma 1. Koray Turkayî derheqê xebate û stratejîya HDPyî de qisey kerd.
Turkayî dîyar kerd seba ke AKP nêeşka binkewtişî hezim bikero YSKyî 6’ê Gulane de qerar da ke weçînitişê Stenbolî newe ra bêro kerdene û wina domna: “No qerarê YSKyî vera netîceyanê weçînitişî de derbeyêk o. Bi nê hawayî înan kerd ke bi destê YSKyî îradeyê şarî xesp bikerê.”
Turkayî va ‘HDP xeylî reyan bi problemê xespî dir têrî mendo’ û wina dewam kerd: “Ma dî ke şaredarîyê Kurdistanî yê ke bi îradeyê şarî ameyî weçînitine hetê AKPyî ra bi rayîrê derbeyî ameyî xespkerdene. Bêguman bajaranê rojawanê welatî de seba ke tecrubeyêko winayên çinbi, pê nêhesîyayî. Bêhuqûqîya ke hemverê HDPyî de ameyêne kerdene amî sereyê CHP, ÎYÎ Partî û Partîya Seadetî. HDP na babete de sîyasetêkê nimûneyî ramojnena ke hemverê xespî de ganî mucadeleyêko senên bêro rayraberdene”
HDP’yî AKP bin fîna
Turkayî stratejîya HDPyî ya nikayêne zî rast dî ke namzedî nêmotî ra û wina va: “Babeta tengekerdişê AKP û MHPyî de aktoro tewr muhîm HDP yo. Babeta nêramotişê namzedan û îqnakerdişê weçînitoxanê xo de zehmetîyî ameyî antene, labelê weçînitoxan ê Kurdan bêdibendî Stenbol, Mersîn, Antalya, Edene û Amed de AKP-MHP bin fînayî. Naye ra eşkena vajî ke bi motîvasyonêkê pîlî tewrê weçînitişanê 23’ê Hezîrane benê.”
ANF / STENBOL