Heyetê Caardişê Merkezî yê HDPyî û Grûba Meclîsî seba ke xerîtaya xo ya ameyeyî aşkere bikerî, Amed de kombîyayîşêk viraşt. Kombîyayîş nizdîyê 6 saetan domîya û qerarê zaf muhîmî kombîyayîş de ameyî girewtiş. Qerarê ke kombîyayîş de ameyî girewtiş, bi îzehetêk çapemenîye ameyî aşkerekerdiş. Îzehet hetê Verfekê HDPyî Ayhan Bîlgenî ra ame dayîş. 

Destpêka metnê îzehetî de hêrişê bombeyîn ke Amed de ameybî kerdiş, ameyo şermezarkerdiş û wina domyayo: “Ma seba kesê ke teqayîş de heyatê xo vînî kerdo, keyeyê înan rê serweşî wazenî û dejê înan pare kenî. Reyna ma hemserek, parlamenter û şaredarîyanê xo yê ke ameyî tepiştiş û tewqîfkerdiş bi rêzdarî silam kenî. Ma pey vindetişê înan yê birûmet de yî. Vera zulm, teda û faşîzmî de vindetişê înan moralêko gird dayo ma.”

Qerarê ke ameyî girewtiş 

*Ewro Erdogan û îqtîdarê AKPyî bi hawayêko giran hêrişê muxalefetî û sîyasetê demokratîke keno û heme sazî û dezgeyanê ma keno hedef. Tena HDPyo ke îradeyê 6 mîlyon merdiman girewto nê, heme kesê ke azadî, demokrasî, seyyewbînanî, keda cinîyan û heme şaran hedefê nê hêrişan de ya. Verê destpironêginayîya parlamenteran ame wedarnayîş. Dim ara zî îqtîdarê Erdogan û AKPyî  teşebusê derbe sey firsendêk dî û Tirkîya açarna ‘Komara Qayûme’. Tewr peynî hemserekê ma zî tede 9 parlamenterê ma ameyî tewqîfkerdiş. 

l Grûba ma ya Meclîsî û Heyetê Caardişê Merkezî nîqaşî kerdî û netîceyê nîqaşan de ma qerar da ke vera nê hêrişanê topyekunî de xebatanê xo yê meclîsî de bidî vindarnayîş û yewna rey şarê xo reyde bêrî têhet. Ma do rojanê ameyeyî de keye bi keye, taxe bi taxe, dewe bi dewe, qeza bi qeza û bajar bi bajar bigêrî û pêşnîyaz û gerreyanê şarê xo goşdarî bikerî. Ma do bi rêxistinanê sîvîlan, sendîka û yewîya meslegan, hereketê ekolojî, ciwan, cinî û grûba bawerîyê cîya cîyayan nîqaş bikerî û fikrê înan bigîrî. Ma do netîceyê nê nîqaş û fikir girewtişî şarê xo rê pare bikerî. Tena parekerdiş nê netîceyê fikir û nîqaşan ma do seba ameyeyê xo gaman bierzî. Vera ‘Komara Qayûme’ de ma do têkoşînê ‘Komara Demokratîke’ gird bikerî.

* HDP bi heme sazî û dezgeyanê xo, îtîfak, hemserek, parlamenter, endam û rêxistinanê xo temînatê sîyasetê demokratîke û muxalefetê demokratîke yê Tirkîya yo. Tepiştişê embazê ma yê seba demokrasî, aştî û azadîye xebate kenî zî nêşkeno ma nê têkoşînî ra tepa biverdo. Rayîrê pîyacuyayîşî yê şar, bawerî û kulturê cîya cîyayan estena HDPyî û hêzbîyayîşê îtîfakan mumkun o. Îqtîdar eşkeno yê ke vanî aştî, demokrasî, edalet û azadî an zî hemserekanê ma bierzo hepsan, hetta eşkeno bi xebetanayîşê şîdetî estena xo bidomno la no nêşkeno ma têkoşînê ma ra biqerfno.

Îqtîdarê AKP û Erdoganî ke 1 serre û nîm o ke welatî açarnayo cayê şewatî, seba ke ‘Sîstemê Serekîye yê Tirkan’ awan bikero bîyo sebebê mergê bi hezar kesan û reyna bîyo sebebê bi hezaran kesî zî ca û warê xo ra koç bikerî. Ma bi hawayo aşkere vanî ke ‘Îdarekarîya yewe kesî’ ke bin nameyê ‘Sîstemê Serekîye yê Tirkan’ de îfade beno, faşîzm o, zulm, şer û teda yo.

* Ma tîya ra veng danî hêzê demokrasîye, dezgeyê demokratîke û parlamentoyê heme welatanê dinyaye; Seba heqê merdiman û rêgezê huqûqî yê demokratîke vengê xo berz bikerê û tehdîtanê Erdogan rê sere meronê. Çimkî îqtîdarê Erdogan û AKPyî game bi game Tirkîyaye açarnenî rejîmêko totalîter. Eke nêro vindarnayîş seba welatanê herême û şaranê Ewropaye zî tehdîtêko gird o. Ma veng danî hêzê aştî, kede û demokrasîya Tirkîya û kesê wayîrê wijdan î; vengdayîşê ma tena piştîdayîşê HDPyî nîyo. Vengdayîşê ma seba azadî, seyyewbînanî û edaletî têkoşînê ortax o. Ma do nê kerdişan ver sere nêronî û vera dîktatorîye de ma do pêşnîyazanê xo yê demokratîke vila bikerî. Ma ganî qet xo vîra nêkerî ke ma hêvîyê Tirkîya yî, roşnîya azadî û demokrasî yî. Ma do nê hêvî û roşnîye pîya gird bikerî.

Şarê ma do qerar bidero

Wendişê metnê îzehetî ra dima Bîlgenî va: “Ma xebatanê komîsyon û xebatanê Heyetê Pêroyî danî vindarnayîş. Qerarê ancîyayîş û nêancîyayîşî ma do şarê xo reyde biderî. Nê qeraranê xo ra dima ma do paweyê nizdîbîyayîşê Serekomar û Serekwezîrî bivinderî.” 


 ANF / AMED