Cayê ke tede xebatê weçînayîşî yenî domnayîş ra yew zî Gurgum o. Gurgum de şar destekêko gird dano xebatan û bi şewe û roje bêmabên xebatî dewam kenî.
Babete ser o namzedanê HDPyî yê Gurgumî ra Şahîn Şanciyî qisey kerd û derheqê xebatanê weçînayîşî de melumatê muhîmî pare kerdî. Şanciyî va ‘Nika Gurgum de AKP û MHP ra xeylê kesî beşdarê HDPyî bîyî’ û wina domna: “Netîceyê xebatanê ma de Gurgum do bibo qeleya HDPyî. Seke yeno zanayîş 1978 de tîya de qetlîyamêk virazîya û hîna zî tesîrê ci estî. Cok ra şar azadî, demokrasî û cuya neweyî HDP de vîneno.”
Şanciyî qiseykerdişê xo de va ‘Tena HDP eşkeno vernîya qetlîyaman bigîro’ û wina dewam kerd: “Ma hewl danî cuya ke heme bawerîyî tede bişînbî bicuyî, awan bikerî. Cok ra şarê ma destekêko gird dano ma. Ma her qeza û dewe de coşêko gird vînenî. Ma bawer kenî ke ma do Gurgum de qezenç bikerî. HDP do Gurgum de parlamenter bivejo. Ma vînenî ke şar wayîrê HDPyî vejîyeno. Ma dewe bi dewe, taxe bi taxe, qeza bi qeza û keye bi keye xebetiyenî. HDP Gurgum de bîyo hevîya şaran. Şar do temsîlkaranê xo bierşawo meclîs. HDP partîya azadî, cinî, ciwan û hêvîye ya.” n ANF / GURGUM