Kampanya weçînayin yê HDP bi pêro pêtinya xo ramena. HDP sûkanê Tirkiye ra piya sûkanê Kurdistan de mitîngê heybetîn virazena. Teberê welat de zî reydayiş dewam keno. Goreyê zanayişan weçîntoxê ke teberê welatî de rey danê tercîxê xo hetê HDP kenê. Zerreyê welatî de zî weçîntoxî mitîng û gureyînanê HDP rê eleqeyê do gird damisnenê. Şarê ke hardê Tirkiye û Kurdistan de ciwyenê projeyê ‘Ciwyana Newî’ yê HDP rê wayir vejyenê û qebûl kenê. Eno projeyî sîstemê dewlet de qûl akerd û raya îdareyê şaran akerd. HDP bendaw(dês)’ê weçîntayin ra piya, dêsê dewleta faşîstîn zî lerznena, welişnena. Endî dewrê 92 serriya dîktatoriya partiyanê rejîmî qedîyeno. Cok ra nê weçînayinî mavêna partiya demokratîk yê Şaran û dewletî de ravêrenê.
Endî hometê ke ser na hardî de ciwyenê dîktatoriya AKP bi vengê berz red kenê. No veng AKP û Erdoğan’î vist tersê do gird. Erdoğan’o ke bi no tersî nêşeno rakewo her roj fermananê newî yê hêrişkerdişê HDP dano. Rojanê peynî de merdimanê îxtidarî Edene û Mersîn de bombe riştî buroyanê HDP. Nê hêrişî zî damisnenê ke AKP verra Kurdan konseptê herb vistiro dewre. Sermiyanê AKP yê ke siyaseta demokratîk û exlaqî zey xo taloke vînenê nêwazenê HDP dekewo meclîsî. Nayî ra serva-qandê verîgirotişê HDP û tesfiyekerdişê ci pêrokîn îmkanê dewlet seferber kerdiyê.
Wextanê peynî de operasyonê eskerî, sewqiyatê eskerî zî bî vêşî. Waştena tewr gird yê îxtidar pirodayişê mavêna esker û gerîlayan o. Nayî ra, serva ke gerîlayanê ke pozîsyonê ‘adirbirnayiş’ de yê bancê pirodayişî-herbî her çî kenê.
Konseptê tesfiye yê newî yê AKP nînan ra bi sînor niyo. AKP ya ke anketanê weçînayiş de gonî, enerjî, rey û eleqe vinîkena reyna-fina verra Rayverê Şarê Kurd Abdullah Öcalan’î destpa tecrît kerd. Xo ra îxtidara diriyî, zûrker û komploger nika werzena ‘pêvacoya çarekerdin, pêdiyayinê ke Îmrali de viraziyay û mutabakatê wertex yê hikûmet û heyetê Îmrali înkar kena.
La AKP, dewleta derbekar se kena wa bikero, nêşkena verniya HDP û îradeyê şaran, waştenanê înan bigîro. Padîşaxê zûrker se keno wa bikero endî nêşeno verniya welişnayişê hegemonyaya xo bigîro. Endî kes nêşkeno Erdoğan’î û AKP bireyno. Yê ke şaran rê zilm kenê, werdişê herram wenê, tirene-diznenê roja hesapdayişê înan nezdî bena. Laz, Çerkez, Turkmen, Romen, Ermenî, Kurd, Suryanî, xeyrî-muslim, cenî, genç, pêrokîn çormeyê ke dewlet heta nika înkar kerd û qetilkerd hesap pers kenê.
Reîs-cumhurê Tirkiye o ke qerarê îdam yê verra reîs-cumhurê verrî yê Misir Mursî rê nêrazîbiyen damisneno, zano ke qor-dorê hesapdayiş yeno ci. La wa Erdoğan biterso, çi ke roja hesapdayiş de ne Erebîstan, ne Qatar, ne Îran, ne Emerîqa û ne zî DAIŞ do biro hawarê ci. Pêrokîn şarê na hardî dê qirika Erdoğan’î bigîrê û ci ra hesap pers kerê. Ê rojî nezdiyê. Çi ke endî mîladê faşîzm, dewrê derbeyan, derbê padîşah û dîktatoran qediya. Endî dêsê dewleta Tirkiye zî qelişenê û welişenê…