4ê teşrîna peyêne de Tirkîya de vera HDPyî de derbeyêka gird ameybî viraştiş û çarçeweya na derbe de Hemserekê HDPyî Selahattîn Demîrtaş, Fîgen Yuksekdage û parlamenterê HDPyî zî xeylê parlamenterî ameybî tepiştiş û înan ra 10 kesî ameybî tewqîfkerdiş. Na derbe ver HDP zî Amed de kombîyayîşê Heyetê Caardişê Merkezî (MYK) viraştbî û kombîyayîş de qerarê meclîs de vindarnayîşê xebatanê xo yê qanûnviraştişî bi hawayo demdemî girewtbî.
HDPyî wexto ke qerarê vindarnayîşê xebatan seba demêk girewtbî, aşkere kerdbî ke ê do zaf cayan de şarî reyde kombîyayîşan bikerî û plansazîya xo ya pêroyî virazî. Na çarçewa de heta nika xeylê cayan de bi hezaran kesan reyde kombîyayîşê şarî ameyî viraştiş. Goreyo ke ame musayîş nê kombîyayîşan de hîna zafêr fikrê domnayîşê xebatan vejîyayo aver. Bi taybetî peynîya hewteyî de Îstanbul û Amed de bi rêxistinanê partîye kombîyayîşî ameyî viraştiş û nê kombîyayîşan de fikrê domnayîşê xebatan vejîyayo aver. Tewr peynî roja dişeme kombîyayîşo ke çapemenîye rê padaye ame viraştiş de netîceyê nê kombîyayîşan ser o ame munaqeşekerdiş.
Seba muxalefetî
Goreyê malumato ke kulîsanê partîye ra ameyo girewtiş, seba ke HDP Meclîs de rolê xo yê muxalefetî bîyaro ca û bi hawayo aktîf kursîyê Meclîsî bixebetno, domnayîşê xebatanê qanûnviraştişî ameyo girewtiş. Yeno zanayîş ke bi aşman o ke vera HDPyî de hêrişê zaf girdî yenî kerdiş û no qerar zî seba vera nê hêrişan de domnayîşê muxalefetîye ameyo girewtiş. Goreye malumatî qeraro ke ameyo girewtiş parlamenteran ra zî ameyo vatiş. Qerar vizêr hetê Ayhan Bîlgenî kombîyayişê koma HDP de ame aşkerekerdiş.
DÎHABER / ENQERA