SERKAN DEMÎREL /ANF/BERN
Ewropa de xebatê hedefgirewtişê kurdan yê MÎTî sere de Almanya û xeylê bajaranê Ewropa de dewam kenî. Heta nika no het de xeylê çîyî ameyî dîyayîş û hîna zî vejîyenî. Ewropa zî vera nînan de vindetişêko zelal nîşan nêdana û o wext persê ‘gelo kurdî benî qurbanê têkilîyanê dîplomatîkan?’ yeno vîrê merdimî.
Babete ser o Selahîyetdarêkî polîsan ke nêwaşt nameyê xo bido, qisey kerd.
Selahîyetdarî va ‘MÎT sey Almanya, Swîsre de zî faelîyetan meşneno’ û wina dewam kerd: “Têkilîya MÎTî bi konsolosxaneyê tirkan û Weqfê Dîyanetî yê Tirkî reyde esto û faelîyetan nê cayan de meşneno. Polîsê Swîsre nê faelîyetan nizdî ra taqîp keno. Seba ke kesê ke MÎTî rê xebetîyenî, bi hawayo legal yenî Swîsre, ma nêşenî mudaxaleyê înan bikerî. Seba mudaxaleyî lazimî bi delîlan esta.”
Ganî muracatê ma bikerî
Selahîyetdarî dîyar kerd ke çalakî û aktîvîteyê kurdan hetê kesê ke dewleta tirkî rê xebetîyenî ra yenî şopnayîş û wina domna: “Sîyasetmedarê ke guman kenî ke yenî taqîpkerdiş, ganî muracatê ma bikerî. Sîyasetmedarê sey Remzî Kartal, Zubeyîr Aydar û sewbîna hedef de yî. Cok ra ewleyîya nê kesan muhîm a. Îmamê ke camîyanê Dîyanetî de wezîfe kenî, faelîyetanê ajanî meşnenî. Ma muhtewaya nê xebatan baş zanî. Raporê ke ma amade kerdbî, pêşkêşê hukmatî yenî kerdiş. Labelê hîna zî gamî nêameyî eştiş. No het de xeylê çîyî benî qurbanê têkilîyanê dîplomatîkan. Xeylê ciwanê kurdan hedefê nê kesan de yî. Wazenî ciwananê kurdan vera kurdan de bixebetnî.”